אֶל-הַקּוֹרִנְתִּיִּים א

א    1 פּוֹלוֹס הַשָּׁלִיחַ אֲשֶׁר בָּחַר-בּוֹ יֵשׁוּעַ הַמָּשִׁיחַ בִּרְצוֹן אֱלֹהִים אֲנִי וְסוֹסְתְּנִיס אָחִינוּ׃ 2 אֶל-עֲדַת אֱלֹהִים בְּקֹרִנְתּוֹס הַבְּחִירִים וְהַקְּדשִׁים אֲשֶׁר בְּיֵשׁוּעַ הַמָּשִׁיחַ הִתְקַדָּשׁוּ עִם כָּל-הַקֹּרְאִים בְּכָל-מָקוֹם בְּשֵׁם יֵשׁוּעַ הַמָּשִׁיחַ הוּא אֲדֹנֵיהֶם וַאֲדֹנֵינוּ׃ 3 חֶסֶד וְשָׁלוֹם יִתֵּן לָכֶם אֱלֹהִים אָבִינוּ וַאֲדֹנֵינוּ יֵשׁוּעַ הַמָּשִׁיחַ׃ 4 אֲבָרֵךְ אֶת-אֱלֹהַי תָּמִיד עַל-חַסְדּוֹ אֲשֶׁר גָּמַל עֲלֵיכֶם בְּיֵשׁוּעַ הַמָּשִׁיחַ׃ 5 כִּי בוֹ מְצָאתֶם אוֹן לָכֶם בַּכֹּל בְּכָל-מַדָּע וְהַשְׂכֵּל׃ 6 כַּאֲשֶׁר עֵדוּת הַמָּשִׁיחַ נֶאֶמְנָה בָכֶם׃ 7 עַד אֲשֶׁר-לֹא חֲסַרְתֶּם מְאוּמָה מִכָּל-מַתַּת-יָהּ וְעֵינֵיכֶם צֹפִיּוֹת לְהִגָּלוֹת נִגְלוֹת פְּנֵי אֲדֹנֵינוּ יֵשׁוּעַ הַמָּשִׁיחַ׃ 8 אֲשֶׁר גַּם-הוּא יְכוֹנֵן אֶתְכֶם עַד-הַקֵּץ לְבִלְתִּי יִמָּצֵא בָכֶם שֶׁמֶץ דָּבָר בְּיוֹם אֲדֹנֵינוּ יֵשׁוּעַ הַמָּשִׁיחַ׃ 9 כִּי נֶאֱמָן הוּא הָאֱלֹהִים אֲשֶׁר נִקְרֵאתֶם בּוֹ לְדָבְקָה בִּבְנוֹ יֵשׁוּעַ הַמָּשִׁיחַ אֲדֹנֵינוּ׃ 10 וַאֲנִי דֹרֵשׁ מִכֶּם אַחַי בְּשֵׁם אֲדֹנֵינוּ יֵשׁוּעַ הַמָּשִׁיחַ לְדַבֵּר כֻּלְּכֶם פֶּה אֶחָד וְאַל-תִּתְגֹּדְדוּ לִפְלַגּוֹת כִּי אִם-הִתְחַבְּרוּ יַחְדָּו בְּלֵב אֶחָד וּבְעֵצָה אֶחָת׃ 11 כִּי הֻגַּד-לִי אַחַי מִפִּי בְנֵי-בֵית כְּלוֹאָה כִּי-דִבְרֵי רִיבוֹת בְּשַׁעֲרֵיכֶם׃ 12 וְהִנֵּה זֶה דְבָרִי אִישׁ אִישׁ מִכֶּם אֹמֵר אֲנִי לְפוֹלוֹס אוֹ אֲנִי לְאַפּוֹלוֹס אוֹ אֲנִי לְכֵיפָא אוֹ אֲנִי לַמָּשִׁיחַ׃ 13 הֲכִי נֶחֱלַק הַמָּשִׁיחַ הֲנִצְלַב פּוֹלוֹס בַּעַדְכֶם אוֹ הֲנִטְבַּלְתֶּם בְּשֵׁם פּוֹלוֹס׃ 14 שׂוֹשׂ אָשִׂישׂ בֵּאלֹהִים כִּי לֹא-טָבַלְתִּי אִישׁ מִכֶּם זוּלָתִי קְרִסְפּוֹס וְגָיוֹס׃ 15 פֶּן-יֹאמְרוּ כִּי-נִטְבַּלְתֶּם בִּשְׁמִי׃ 16 אַךְ טָבַלְתִּי גַם אֶת-בְּנֵי-בֵית סְטְפָנוֹס וּמִלְּבַד אֵלֶּה אֵינֶנִּי יֹדֵעַ עוֹד אִם-טָבַלְתִּי אִישׁ אַחֵר׃ 17 כִּי לֹא שְׁלָחַנִי הַמָּשִׁיחַ לְטַבֵּל כִּי אִם-לְבַשֵּׂר וְלֹא-בְחָכְמַת שְׂפָתַיִם פֶּן-יִהְיֶה צְלַב הַמָּשִׁיחַ לְתֹהוּ׃ 18 כִּי-פִתְגָּם הַצְּלַב כִּפְתַיּוּת הוּא לָאֹבְדִים וְלָנוּ הַנּוֹשָׁעִים הוּא גְּבוּרַת אֱלֹהִים׃ 19 כִּי-כָתוּב אֲאַבֵּד חָכְמַת חֲכָמִים וּבִינַת נְבוֹנִים אַסְתִּיר׃ 20 אַיֵּה חָכָם אַיֵּה סֹפֵר אַיֵּה שֹׁקֵל חִקְרֵי הָעוֹלָם הֲלֹא סִכֵּל אֱלֹהִים אֶת-חָכְמַת הָעוֹלָם הַזֶּה׃ 21 כִּי אַחֲרֵי אֲשֶׁר הָעוֹלָם בְּחָכְמָתוֹ לֹא יָדַע אֶת-הָאֱלֹהִים בָּאָה חָכְמַת אֱלֹהִים וּרְצוֹנוֹ בְּסִכְלוּת הַבְּשׂרָה לְהוֹשִׁיעַ אֶת-הַמַּאֲמִינִים׃ 22 כִּי הַיְּהוּדִים שֹׁאֲלִים אוֹת וְהַיְּוָנִים מְבַקְשִׁים חָכְמָה׃ 23 וַאֲנַחְנוּ מְבַשְּׂרִים בְּאָזְנֵיהֶם הַמָּשִׁיחַ הַנִּצְלָב לַיְּהוּדִים לְמִכְשׁוֹל וְלַיְּוָנִים לְסִכְלוּת׃ 24 אַךְ לִבְחִירִים גַּם-לִיהוּדִים גַּם-לִיְוָנִים מָשִׁיחַ גְּבוּרַת אֱלֹהִים וְחָכְמַת אֱלֹהִים׃ 25 כִּי סִכְלוּת אֱלֹהִים טוֹבָה מֵחָכְמַת אָדָם וְרִפְיוֹן יְדֵי אֱלֹהִים אֵיתָן מִכֹּחַ גָּבֶר׃ 26 הֲלֹא תִרְאוּ מִי אַתֶּם אַחַי קְרוּאֵי-יָהּ לֹא רַבִּים חֲכָמִים לְעֵינֵי בָשָׂר לֹא רַבִּים גִּבֹּרֵי חַיִל וְלֹא רַבִּים נְדִיבֵי אָרֶץ׃ 27 כִּי הַפְּתָאיִם בְּעֵינֵי הָעוֹלָם בָּחַר בָּם אֱלֹהִים לְהַכְלִים אֶת-הַחֲכָמִים וּרְפֵי הַיָּדַיִם בְּעֵינֵי הָעוֹלָם בָּם בָּחַר לְהַכְלִים אֶת-הָאֵיתָנִים׃ 28 וְדַלַּת עַם הָאָרֶץ וְהַנִּבְזִים אֲשֶׁר כְּאֶפֶס נֶחְשָׁבוּ בָּחַר בָּם אֱלֹהִים לַעֲשׂוֹת לְאֶפֶס אֶת-הָאֹמֵר אֲנִי וְאַפְסִי עוֹד׃ 29 לְמַעַן לֹא-יִתְהַלֵּל כָּל-בָּשָׂר לִפְנֵי הָאֱלֹהִים׃ 30 אַךְ אַתֶּם מֵאִתּוֹ הִנְּכֶם בְּיֵשׁוּעַ הַמָּשִׁיחַ אֲשֶׁר הָיָה לָנוּ לְחָכְמָה מִיַּד הָאֱלֹהִים לְצַדְּקֵנוּ לְקַדְּשֵׁנוּ וְלִפְדּוֹת אֶת-נַפְשֵׁנוּ׃ 31 וְכֵן יָקוּם הַדָּבָר כַּכָּתוּב הַמִּתְהַלֵּל יִתְהַלֵּל בַּיהוָֹה׃

ב    1 וַאֲנִי כַּאֲשֶׁר בָּאתִי אֲלֵיכֶם אֶחַי לֹא בִמְלִיצַת הַשָּׂפָה וְלֹא בְיִתְרוֹן הַחָכְמָה בָּאתִי לְהַגִּיד לָכֶם אֶת-עֵדוּת אֱלֹהִים׃ 2 כִּי נֶחֱרָצָה בְלִבִּי לִבְלִי הִתְבּוֹנֵן בֵּינֵיכֶם אֶל-דָּבָר אַחֵר כִּי אִם-אֶל-יֵשׁוּעַ הַמָשִׁיחַ אֶל-הַנִּצְלָב׃ 3 וַאֲנִי הָיִיתִי עִמָּכֶם בְּלֹא-כֹחַ בְּפַחַד וּבִרְעָדָה גְדֹלָה׃ 4 וְלֹא הָיָה דְבָרִי וּקְרִיאָתִי לְפַתֹּתְכֶם בְּאִמְרֵי חָכְמַת-אֲנָשִׁים כִּי אִם-בִּתְעוּדָה נֶאֱמָנָה מִפִּי הָרוּחַ וּמִפִּי הַגְּבוּרָה׃ 5 לְמַעַן תִּכּוֹן אֱמוּנָתְכֶם בִּגְבוּרַת אֱלֹהִים וְלֹא בְּחָכְמַת אֲנָשִׁים׃ 6 וְדִבְרֵי חָכְמָה אֲנַחְנוּ מְדַבְּרִים בֵּין הַשְּׁלֵמִים אֶפֶס לֹא מֵחָכְמַת בְּנֵי הָעוֹלָם הַזֶּה וְלֹא מֵחָכְמַת שָׂרֵיהֶם אֲשֶׁר לְאֶפֶס וָתֹהוּ נֶחְשָׁבוּ׃ 7 כִּי אִם-מְדַבְּרִים אֲנַחְנוּ סִתְרֵי חָכְמַת אֱלֹהִים וְרָזֵי עוֹלָם אֲשֶׁר צָפַן לָנוּ מֵרֹאשׁ מִקַּדְמֵי אֶרֶץ לִכְבוֹדֵנוּ׃ 8 הִיא הַחָכְמָה אֲשֶׁר לֹא יְדָעָהּ אִישׁ מִשָּׂרֵי הָעוֹלָם הַזֶּה כִּי לוּ יָדְעוּ לֹא הוֹקִיעוּ אֶת-אֲדוֹן הַכָּבוֹד׃ 9 אַךְ כַּכָּתוּב אֲשֶׁר-עַיִן לֹא-רָאֲתָה וְאֹזֶן לֹא שָׁמָעָה וְלֹא עָלָה עַל-לֵב אִישׁ אֲשֶׁר-הֵכִין הָאֱלֹהִים לְאֹהֲבָיו׃ 10 וְכָל-אֵלֶּה גִּלָּה לָנוּ אֱלֹהִים עַל-פִּי רוּחוֹ כִּי הָרוּחַ חֹקֵר הַכֹּל אַף עֹמֶק חֵקֶר אֱלֹהִים יִמְצָא׃ 11 כִּי מִי מִבְּנֵי אָדָם יֹדֵעַ אֵת אֲשֶׁר בְּלֵב הָאָדָם בִּלְתִּי רוּחַ הָאָדָם אֲשֶׁר בְּקִרְבּוֹ כֵּן אֵין-אִישׁ יֹדֵעַ אֵת אֲשֶׁר בְּלֵב הָאֱלֹהִים בִּלְתִּי רוּחַ הָאֱלֹהִים לְבַדּוֹ׃ 12 וַאֲנַחְנוּ אֵין אִתָּנוּ רוּחַ הָעוֹלָם כִּי אִם-רוּחַ אֱלֹהִים דֹּבֵר בָּנוּ לְבַעֲבוּר נֵדַע אֶת-הַמַּתָּנוֹת הַנְּתֻנוֹת לָנוּ מִיַּד הָאֱלֹהִים׃ 13 וְגַם לֹא בְמִלּוֹת אֲשֶׁר תּוֹרֶה חָכְמַת אֲנָשִׁים נְדַבֵּר כִּי אִם-מִלּוֹת רוּחַ הַקֹּדֶשׁ עַל-לְשׁוֹנֵנוּ וְאֵת אִמְרֵי רוּחַ בָּאֵר נְבָאֵר עַל-פִּי אִמְרֵי רוּחַ׃ 14 אֶפֶס בֶּן-אָדָם בֶּן-בָּשָׂר וָדָם לֹא יַקְשִׁיב לְאִמְרֵי רוּחַ הָאֱלֹהִים כִּי-כְסִכְלוּת הֵם בְּעֵינָיו וְהַשְׂכֵּל לֹא יוּכַל כִּי רוּחַ אֵין בּוֹ אֲשֶׁר רַק עַל-יָדוֹ יִשַּׁפֵטוּ׃ 15 אַךְ אִישׁ אֲשֶׁר רוּחַ בּוֹ יִשְׁפֹּט כָּל-דָּבָר וְהוּא לֹא-יִשָּׁפֵט מֵאִישׁ׃ 16 כִּי מִי-תִכֵּן אֶת-רוּחַ יְהוָֹה וְאִישׁ עֲצָתוֹ יוֹדִיעֶנּוּ אָכֵן אִתָּנוּ רוּחַ הַמָּשִׁיחַ׃

ג    1 וַאֲנִי לֹא יָכֹלְתִּי אָז לְדַבֵּר אֲלֵיכֶם אַחַי כְּאַנְשֵׁי רוּחַ כִּי אִם-כִּבְנֵי בָשָׂר וָדָם כְּעֹלְלִים בַּמָּשִׁיחַ׃ 2 הִרְוֵיתִי אֶתְכֶם חָלָב וְלֹא נָתַתִּי לָכֶם לָחֶם כִּי לֹא-הָיָה בָכֶם כֹּחַ לֶאֱכֹל וְגַם עַד-הַיּוֹם כֹּחַ לָכֶם אָיִן׃ 3 כִּי עוֹד הַיּוֹם בְּנֵי בָשָׂר אַתֶּם כִּי כַּאֲשֶׁר תִּתְגֹּדְדוּ בְקִנְאָה וּמְרִיבָה הֲלֹא בְנֵי בָשָׂר הִנְּכֶם וּבְדַרְכֵי בְנֵי אָדָם תִּתְהַלָּכוּן׃ 4 וְכַאֲשֶׁר יֹאמַר אֶחָד מִכֶּם אֲנִי לְפוֹלוֹס וְהַשֵּׁנִי יֹאמַר אֲנִי לְאַפּוֹלוֹס הֲלֹא יִלְדֵי בָשָׂר הִנְּכֶם׃ 5 מִי הוּא אַפּוֹלוֹס וּמִי-הוּא פוֹלוֹס מְשָׁרְתִים הֵם אֲשֶׁר עַל-פִּיהֶם הֶאֱמַנְתֶּם אִישׁ אִישׁ כַּאֲשֶׁר נָתַן לוֹ הָאָדוֹן׃ 6 אֲנִי נָטַעְתִּי וְאַפּוֹלוֹס הִרְוָה אֲבָל הָאֱלֹהִים הִפְרָה׃ 7 עַל-כֵּן בַּמֶּה נֶחְשָׁב הַנֹּטֵעַ וְהַמַּרְוֶה בַּמֶּה נֶחְשָׁב הוּא כִּי הָאֱלֹהִים הוּא הַמַּפְרֶה׃ 8 וְהַנֹּטֵעַ וְהַמַּרְוֶה כְּאֶחָד הֵם וְאִישׁ אִישׁ יִקַּח אֶת-שְׂכָרוֹ לְפִי עֲמָלוֹ׃ 9 אֲנַחְנוּ עֹשִׂים עִם-הָאֱלֹהִים בִּמְלַאכְתּוֹ וְאַתֶּם שְׂדֵה אֱלֹהִים וּבִנְיַן אֱלֹהִים׃ 10 וַאֲנִי בְּחֶסֶד אֵל אֲשֶׁר גָּמַל עָלָי יָסַדְתִּי אֶת-הַיְסוֹד כְאָמָן מַשְׂכִּיל וְאִישׁ אַחֵר בֹּנֶה עָלָיו אַךְ יִרְאֶה אִם הוּא-בֹנֶה כַּמִּשְׁפָּט׃ 11 כִּי לֹא-יוּכַל אִישׁ לְיַסֵּד יְסוֹד אַחֵר זוּלָתִי יְסוֹד הַמּוּסָּד הֲלֹא הוּא יֵשׁוּעַ הַמָּשִׁיחַ׃ 12 וְאִישׁ כִּי-יִבְנֶה עַל-הַיְסוֹד הַזֶּה בִּנְיַן זָהָב אוֹ כֶסֶף אוֹ אַבְנֵי חֵפֶץ אוֹ עֵצִים וְחָצִיר וָקָשׁ׃ 13 מַעֲשֶׂה כָל-אִישׁ יִוָּדַע בְּאַחֲרִיתוֹ כִּי הַיּוֹם יוֹצִיאוֹ לָאוֹר אַחֲרֵי אֲשֶׁר בָּאֵשׁ יִבָּחֵן כִּי כָל-מַעֲשֶׂה אִישׁ הָאֵשׁ תִּצְרְפֶנּוּ׃ 14 אִם-יַעֲמֹד מַעֲשֵׂהוּ כַּאֲשֶׁר בָּנָה יִקַּח-לוֹ שְׂכַר עֲמָלוֹ׃ 15 וְאִם-מַעֲשֵׂהוּ יִשָּׂרֵף יֹאבַד שְׂכַר עֲמָלוֹ אַךְ הוּא יִנָּצֵל כְּאוּד מֻצָּל מֵאֵשׁ׃ 16 הֲלֹא יְדַעְתֶּם כִּי אַתֶּם מִשְׁכַּן אֱלֹהִים וְרוּחַ אֱלֹהִים שֹׁכֵן בְּתוֹכֲכֶם׃ 17 אִישׁ כִּי-יַשְׁחִית אֶת-מִשְׁכַּן אֱלֹהִים הָאֱלֹהִים יַשְׁחִיתֶנּוּ כִּי-מִשְׁכַּן אֱלֹהִים קָדוֹשׁ הוּא וְהַמִּשְׁכָּן הַהוּא אַתֶּם הֵם׃ 18 אַל-יַתְעֶה אִישׁ אֶת-נַפְשׁוֹ מִי בָכֶם אֲשֶׁר לְחָכָם יִתְחַשֵּׁב בָּעוֹלָם הַזֶּה יְהִי לִכְסִיל לְמַעַן יֶחְכָּם׃ 19 כִּי-חָכְמַת הָעוֹלָם הַזֶּה כְּסִילוּת הִיא בְּעֵינֵי הָאֱלֹהִים כִּי-כֵן כָּתוּב לֹכֵד חֲכָמִים בְּעָרְמָם׃ 20 וְעוֹד יְהוָֹה יֹדֵעַ מַחְשְׁבוֹת חֲכָמִים כִּי הֵמָּה הָבֶל׃ 21 לָכֵן אַל-יְתְהַלֵּל הַמִּתְהַלֵּל בִּבְנֵי אָדָם כִּי הַכֹּל לָכֶם׃ 22 אִם-פּוֹלוֹס אַפּוֹלוֹס אוֹ כֵיפָא אִם-תֵּבֵל חַיִּים אוֹ מָוֶת אִם הוִֹים אוֹ עֲתִידִים כֻּלָּם לָכֶם הֵמָּה׃ 23 וְאַתֶּם לַמָּשִׁיחַ וְהַמָּשִׁיחַ לֵאלֹהִים׃

ד    1 וְהִנֵּה כָּל-אָדָם יַכִּירֵנוּ כִּי מְשָׁרְתִּים לַמָּשִׁיחַ אֲנַחְנוּ וּפְקִידִים עַל-בָּתֵּי סוֹד אֱלֹהִים׃ 2 אָכֵן כָּל-פָּקִיד עוֹד יִדָּרֵשׁ מִיָּדוֹ לִהְיוֹת נֶאֱמָן עַל-מִשְׁמַרְתּוֹ׃ 3 וַאֲנִי אַף כִּמְעַט נֶחְשָׁב לִי הֱיוֹתִי נִשְׁפָּט בְּמִשְׁפַּטִכֶם אוֹ בְּדִין כָּל-בְּנֵי חֲלוֹף בַּאֲשֶׁר אֵינֶנִּי שֹׁפֵט לְנַפְשִׁי גַּם-אָנִי׃ 4 כִּי אֵינֶנִּי יֹדֵעַ מָה עִמָּדִי אֶפֶס בְּזֹאת לֹא אֶצְדַּק עוֹד אַךְ שֹׁפְטִי הוּא יְהוָֹה׃ 5 עַל-כֵּן אַל-תִּשְׁפְּטוּ דָבָר לִפְנֵי עִתּוֹ עַד כִּי-יָבוֹא הָאָדוֹן אֲשֶׁר יוֹצִיא תַעֲלֻמוֹת מִנִּי-חשֶׁךְ וּמְזִמּוֹת לֵב יְגַלֶּה לְעֵין הַשֶּׁמֶשׁ וְאָז יִשָּׂא אִישׁ אִישׁ תְּהִלָּתוֹ מִלִּפְנֵי אֱלֹהִים׃ 6 וּבְזֹאת אַחַי נָשָׂאתִי אֶת-אִמְרָתִי עָלַי וְעַל-אַפּוֹלוֹס לְהוֹעִיל לָכֶם לְבַעֲבוּר תִּלְמְדוּ מִמֶּנּוּ לְבַל יַחְשָׁב-אִישׁ אֶת-עֶרְכּוֹ יֶתֶר מֵעַל-הַמִּדָּה הַכְּתוּבָה פֹה וּלְבַל תֶּהְבָּלוּ לָתֵת יֶתֶר שְׂאֵת לְאִישׁ בִּפְנֵי-רֵעֵהוּ׃ 7 וְאַתָּה מִי נְתָנְךָ עֶלְיוֹן עַל-חֲבֵרֶיךָ מַה בְּיָדְךָ אֲשֶׁר לֹא קִבַּלְתָּ וְאִם-קִבַּלְתָּ לָמָּה-זֶּה תִתְפָּאֵר בְּחֶלְקְךָ כְּמוֹ לֹא קִבַּלְתָּ׃ 8 הִנֵּה אַתֶּם כַּיּוֹם שְׂבַעְתֶּם עֲשַׂרְתֶּם מְלַכְתֶּם מִבַּלְעָדֵינוּ מִי יִתֵּן וּמָלֹךְ תִּמְלְכוּ וּמָלַכְנוּ עִמָּכֶם גַּם-אֲנָחְנוּ׃ 9 כִּי אֲנַחְנוּ הַשְּׁלִיחִים חָשַׁבְתִּי בִּלְבָבִי נְתָנָנוּ אֱלֹהִים בִּשְׁפַל הַמַּדְרֵגָה כִּלְקוּחִים לַמָּוֶת כִּי לִשְׂחֹק הָיִינוּ תַּחַת כָּל-הַשָּׁמַיִם לְעֵינֵי צְבָא הַמָּרוֹם וּלְעֵינֵי בְנֵי הָאָדָם׃ 10 כְּסִילִים אֲנַחְנוּ לְמַעַן הַמָּשִׁיחַ וְאַתֶּם חֲכָמִים בַּמָּשִׁיחַ אֲנַחְנוּ חַלָּשִׁים וְאַתֶּם גִּבּוֹרִים אַתֶּם נִכְבָּדִים וַאֲנַחְנוּ נִבְזִים׃ 11 וְעַד-הַיּוֹם הַזֶּה אֲנַחְנוּ רְעֵבִים גַּם-צְמֵאִים עֲרֻמִּים מֻכִּים וְנֹדְדִים׃ 12 בַּעֲמַל כַּפֵּנוּ נִיגַע וְנַעֲבֹד כִּי יְקַלְלֻנוּ נְבָרֵךְ וְכִי יִרְדְּפוּנוּ נִתֵּן בֶּעָפָר פִּינוּ׃ 13 הֵם מְגַדְּפִים וַאֲנַחְנוּ תְפִלָּה וַנְּהִי כְדֹמֶן עַל-פְּנֵי הָאָרֶץ וּכְסוּחָה בְּעֵינֵי כֹל עַד-הַיּוֹם הַזֶּה׃ 14 וְלֹא לְהַכְלִימְכֶם כָּתַבְתִּי כַדְּבָרִים הָאֵלֶּה כִּי אִם-לְהוֹכִיחַ אֶתְכֶם עַל-פְּנֵיכֶם כְּבָנַי שֶׁאָהֲבָה נַפְשִׁי׃ 15 כִּי אִם-גַּם-רִבֲבוֹת מוֹרִים לכֶם בַּמָּשִׁיחַ לֹא אָבוֹת רַבִּים לָכֶם כִּי בְיֵשׁוּעַ הַמָּשִׁיחַ אָנֹכִי הוֹלַדְתִּי אֶתְכֶם עַל-יְדֵי הַבְּשׂרָה׃ 16 וְעַל-כֵּן אֲנִי דֹרֵשׁ מִכֶּם לָלֶכֶת בְּעִקְּבוֹתָי׃ 17 בַּעֲבוּר זֹאת שָׁלַחְתִּי אֲלֵיכֶם אֶת-טִימוֹתִיּוֹס בְּנִי יְדִידִי הַנֶּאֱמָן בַּאֲדֹנֵינוּ לְהַזְכִּיר לִפְנֵיכֶם אֶת-אָרְחוֹת חַיָּתִי בַּמָּשִׁיחַ כַּאֲשֶׁר גַּם-כֵּן אֲנִי מוֹרֶה לְכָל-עֵדָה וְעֵדָה בִּמְקֹמוֹת מוֹשְׁבֹתֵיהֶן׃ 18 יֵשׁ מַהְבִּלִים אֶתְכֶם לַאמֹר כִּי לֹא-אָבוֹא אֲלֵיכֶם׃ 19 אַךְ הִנְנִי בָא אֲלֵיכֶם בְּקֶרֶב הַיָּמִים אִם-יִרְצֶה יְהוָֹה וְאָז לֹא-אָחוּשׁ לְדִבְרֵי הַמַּהְבִּילִים כִּי אִם-אֶרְאֶה מַה-גְּבוּרָתָם׃ 20 כִּי לֹא בִדְבַר שְׂפָתַיִם תִּכֹּן מַלְכוּת הָאֱלֹהִים כִּי אִם-בִּגְבוּרָה׃ 21 וְעַתָּה מָה-רְצוֹנְכֶם אִם כֹּה אָבוֹא אֲלֵיכֶם בְּשֵׁבֶט מוּסָר אוֹ בְאַהֲבָה וְעַנְוַת רוּחַ׃

ה    1 מִפִּי-כֹל יָצְאָה הַשְּׁמוּעָה כִּי-זְנוּת בְּקִרְבְּכֶם וּזְנוּת אֲשֶׁר אֵין גַּם-בְּקֶרֶב הַגּוֹיִם כִּי-יְגַלֶּה אִישׁ אֶת-עֶרְוַת אָבִיו׃ 2 וְאַתֶּם תַּרְחִיבוּ פֶה וְלֹא תִתְאַבְּלוּ עַד-אֲשֶׁר הִכָּרֵת יִכָּרֵת הָאִישׁ הָעֹשֶׂה זֹאת מֵעֲדַתְכֶם׃ 3 וְאָנֹכִי אַף כִּי מֵרָחוֹק אָנִי הִנְנִי עֹמֵד אֶצְלְכֶם בְּרוּחִי וּכְדַיָּן בֵּינֵיכֶם כְּבָר חָרַצְתִּי מִשְׁפַּט הָעֹשֶׂה זֹאת׃ 4 כִּי תִתְאַסְּפוּ בְּשֵׁם אֲדֹנֵינוּ יֵשׁוּעַ הַמָּשִׁיחַ וְגַם-רוּחִי בְתוֹכְכֶם עִם-גְּבוּרָה מֵאֵת אֲדֹנֵינוּ יֵשׁוּעַ הַמָּשִׁיחַ׃ 5 וְאָז תִּתְּנוּ אֶת-הָאִישׁ הַזֶּה לִידֵי הַשָּׂטָן לְכַלוֹת אֶת-הַבָּשָׂר וּלְהָבִיא תְשׁוּעָה לָרוּחַ בְּיוֹם יֵשׁוּעַ אֲדֹנֵינוּ׃ 6 לֹא-טוֹב הַדָּבָר אֲשֶׁר תִּתְהַלְּלוּ בְמוֹ-פִיכֶם הֲלֹא יְדַעְתֶּם כִּי שְׂאֹר מְעַט יַחֲמִיץ אֶת-כָּל-הָעֲרִיסָה׃ 7 בַּעֲרוּ אֶת-הַשְּׂאֹר הַיָּשָׁן מִקִּרְבְּכֶם לְמַעַן תִּהְיוּ לַעֲרִיסָה חֲדָשָׁה לְחַלַּת מַצָּה כִּי גַם-מָשִׁיחַ זֶבַח פִּסְחֵנוּ הָקְרַב בַּעֲדֵנוּ׃ 8 וּבְכֵן נָחֹג אֶת-הֶחָג לֹא-בִשְׂאֹר יָשָׁן וְלֹא-בִשְׂאֹר רֹעַ וְרֶשַׁע כִּי אִם-בְּמַצּוֹת תֹּם וֶאֱמֶת׃ 9 כָּתַבְתִּי אֲלֵיכֶם בְּמִכְתָּבִי לְבַל תִּתְעָרְבוּ עִם-אַנְשֵׁי זְנוּנִים׃ 10 לֹא אָמַרְתִּי כָזֹאת עַל-אַנְשֵׁי זְנוּנִים בָּעוֹלָם אוֹ עַל-בֹּצְעֵי בֶצַע וְאַנְשֵׁי חָמָס וְעֹבְדֵי אֱלִילִים כִּי אִם-כֵּן הַמִּצְוָה עֲלֵיכֶם לָצֵאת מִן-הָעוֹלָם׃ 11 אֲבָל כָּתַבְתִּי כָזֹאת לְבַל תִּתְעָרְבוּ עִם-אִישׁ אֲשֶׁר בְּשֵׁם אָח יִקָּרֵא וְהוּא אִישׁ זְנוּנִים אוֹ-בֹצֵעַ בֶּצַע אוֹ-עֹבֵד אֱלִילִים אוֹ מְגַדֵּף אוֹ סֹבֵא יַיִן אוֹ אִישׁ חָמָס הוּא הָאִישׁ אֲשֶׁר עִמּוֹ לֹא תֹאכֵלוּ׃ 12 כִּי מַה-לִּי לִשְׁפֹּט אֶת-אֵלֶּה אֲשֶׁר מִחוּץ לַעֲדָתֵנוּ רַק אֵלֶּה אֲשֶׁר בְּקִרְבֵּנוּ הֵם אֹתָם אַתֶּם שֹׁפְטִים׃ 13 אֲבָל אֵלֶּה אֲשֶׁר מִחוּץ אֱלֹהִים יִשְׁפֹּט אֹתָם וְאַתֶּם בַּעֲרוּ אֶת-הָרָע מִקִּרְבְּכֶם׃

ו    1 הֲיָעֹז אִישׁ מִכֶּם אֲשֶׁר-לוֹ רִיב עִם-רֵעֵהוּ לְהַקְרִיב אֶת-מִשְׁפָּטוֹ לִפְנֵי בְנֵי עַוְלָה וְלֹא לִפְנֵי אַנְשֵׁי קֹדֶשׁ׃ 2 הֲלֹא יְדַעְתֶּם כִּי הַקְּדוֹשִׁים שֹׁפְטֵי תֵבֵל וְאִם-אַתֶּם תִּשְׁפְּטוּ תֵּבֵל הַנְקַלֹּתֶם לִשְׁפֹּט דָּבָר קָטֹן׃ 3 הֲלֹא יְדַעְתֶּם כִּי נִשְׁפֹּט גַּם אֶת-הַמַּלְאָכִים וְאַף כִּי-בִדְבָרִים הַנֹּגְעִים בְּמִחְיָתֵנוּ׃ 4 וְאַתֶּם כַּאֲשֶׁר רִיב-לָכֶם בִּדְבַר מִחְיָה תּוֹשִׁיבוּ אֲנָשִׁים רֵיקִים בָּעֵדָה לְשֹׁפְטֵיכֶם׃ 5 לְבָשְׁתְּכֶם אֲנִי מְדַבֵּר הֲכִי אֵין חָכָם בְּקִרְבְּכֶם הֲכִי אֵין גַּם-אֶחָד אֲשֶׁר יָדוֹ מַשֶּׂגֶת לִשְׁפֹּט בֵּין אִישׁ לְאָחִיו׃ 6 וְהִנֵּה אָח נִשְׁפָּט אֶת-אָחִיו לִפְנֵי אֲנָשִׁים אֵין-אֱמוּנָה בָם׃ 7 וְעַתָּה רַע הַדָּבָר מְאֹד כִּי תָרִיבוּ אִישׁ בַּעֲמִיתוֹ מַדּוּעַ לֹא-טוֹב לָכֶם הֱיוֹת עֲשׁוּקִים מַדּוּעַ לֹא-טוֹב הֱיוֹת רְצוּצִים׃ 8 וְאַתֶּם תַּעַשְׁקוּ וּתְרֹצְצוּ אַף אֶת-אֲחֵיכֶם׃ 9 הַאִם לֹא יְדַעְתֶּם כִּי בְנֵי-עַוְלָה לֹא יִירְשׁוּ אֶת-מַלְכוּת הָאֱלֹהִים אַל-תַּתְעוּ אֶת-נַפְשְׁכֶם כָּל-בְּנֵי זְנוּנִים אוֹ עֹבְדֵי אֱלִילִים אוֹ-מְנָאֲפִי אוֹ-קְדֵשִׁים אוֹ-נֹתְנֵי שְׁכָבְתָּם בְּזָכָר׃ 10 אוֹ-גַנָּבִים אוֹ-בֹצְעֵי בֶצַע אוֹ סֹבְאֵי יַיִן אוֹ-מְגַדְּפִים אוֹ אַנְשֵׁי חָמָס כָּל-אֵלֶּה לֹא יִירְשׁוּ אֶת-מַלְכוּת הָאֱלֹהִים׃ 11 וַאֲנָשִׁים כָּאֵלֶּה הָיוּ בָכֶם לְפָנִים אֲבָל רֻחַצְתֶּם נִקְדַּשְׁתֶּם וְנִצְדַּקְתֶּם בְּשֵׁם יֵשׁוּעַ הַמָשִׁיחַ אֲדֹנֵינוּ וּבְרוּחַ אֱלֹהֵינוּ׃ 12 הַכֹּל נָכוֹן לְפָנַי אֲבָל לֹא הַכֹּל לְהוֹעִיל לִי הַכֹּל נָכוֹן לְפָנַי אֲבָל לֹא אֶהְיֶה עֶבֶד לְאֶחָד מֵהֶם׃ 13 הָאֹכֶל לַבֶּטֶן וְהַבֶּטֶן לָאֹכֶל וְהָאֱלֹהִים יְאַבֵּד גַּם-אֶת-שְׁנֵיהֶם וְהַגּוּף אֵינֶנּוּ לִזְנוּת כִּי אִם-קֹדֶשׁ לָאָדוֹן וְהָאָדוֹן לַגּוּף׃ 14 וְהָאֱלֹהִים הֵקִים אֶת-הָאָדוֹן וְגַם-אוֹתָנוּ יָקִים בִּגְבוּרָתוֹ׃ 15 הֲלֹא יְדַעְתֶּם כִּי עַצְמֹתֵיכֶם אֵבָרֵי הַמָּשִׁיחַ הֵם הֲכִי אֶקַּח אֵבָרֵי הַמָּשִׁיחַ לַעֲשׂוֹתָם לְאֵבָרֵי זוֹנָה חָלִילָה׃ 16 הֲכִי לֹא יְדַעְתֶּם כִּי הַנִּצְמָד לְזוֹנָה נִהְיָה עִמָּהּ לְבָשָׂר אֶחָד כְּמוֹ שֶׁנֶּאֱמַר וְהָיוּ שְׁנֵיהֶם לְבָשָׂר אֶחָד׃ 17 וְהַנִּצְמָד לָאָדוֹן נִהְיָה עִמּוֹ לְרוּחַ אֶחָד׃ 18 נוּסוּ אֵפוֹא מִן-הַזְּנוּת כָּל-חֵטְא אֲשֶׁר-יֶחֱטָא הָאָדָם הוּא מִחוּץ לִבְשָׂרוֹ וְאִישׁ זְנוּנִים אֶת-חֶטְאוֹ בִּבְשָׂרוֹ יִתְּנֶנּוּ׃ 19 הֲכִי לֹא-יְדַעְתֶּם כִּי בְשַׂרְכֶם הוּא מִשְׁכַּן רוּחַ הַקֹּדֶשׁ בְּקִרְבְּכֶם אֲשֶׁר נָתַן לָכֶם אֱלֹהִים וְכִי לֹא-שֶׁלָּכֶם אַתֶּם׃ 20 כִּי בִמְחִיר נִקְנֵיתֶם עַל-כֵּן כַּבְּדוּ אֶת-הָאֱלֹהִים בִּבְשַׂרְכֶם וּבְרוּחֲכֶם אֲשֶׁר לֵאלֹהִים הֵמָּה׃

ז    1 וְעַל-אֹדוֹת אֲשֶׁר-כְּתַבְתֶּם הִנְנִי אֹמֵר טוֹב לְאִישׁ לְבַל יִגַּע בְּאִשָׁהּ׃ 2 אַךְ לְהַרְחִיק אֶת-הַזְּנוּת כָּל-אִישׁ יִקַּח-לוֹ אִשָּׁה וְכָל-אִשָּׁה תִּנָּשֵׂא לְבָעַל׃ 3 הָאִישׁ יְמַלֵּא חֶפְצֵי אִשְׁתּוֹ כַּמִּשְׁפָּט וְכֵן הָאִשָּׁה לְבַעְלָהּ׃ 4 אֵין לָאִשָּׁה שִׁלְטוֹן עַל-בְּשָׂרָהּ כִּי אִם-בַּעְלָהּ וְכֵן אֵין לַבַּעַל שִׁלְטוֹן עַל-בְּשָׂרוֹ כִּי אִם-אִשְׁתּוֹ׃ 5 אַל-תִּגְרְעוּ מְנָת אִשָּׁה עִם-אִישָׁהּ בִּלְתִּי אִם-תָּכִינוּ לִבְּכֶם לְתַעֲנִית וּלִתְפִלָּה לְיָמִים מְזֻמָּנִים וְאַחַר תָּשׁוּבוּ וְתָבֹאוּ לָשֶׁבֶת יַחְדָּו פֶּן-יְנַסֶּה אֶתְכֶם הַשָּׂטָן וְתַאֲוַתְכֶם תִּפְרָץ-פָּרֶץ׃ 6 וְזֹאת אֲנִי מְדַבֵּר בְּדֶרֶךְ רִשְׁיוֹן וְלֹא כִּדְבַר מִצְוָה׃ 7 כִּי הוֹאַלְתִּי לוּ יִהְיוּ כָל-בְּנֵי אָדָם כָּמֹנִי אַךְ אֱלֹהִים חָלַק לְכָל-אִישׁ מְנָת חֶלְקוֹ לָזֶה בְּכֹה וְלָזֶה בְּכֹה׃ 8 וְלַאֲנָשִׁים אֲשֶׁר נָשִׁים אֵין לָהֶם אוֹ לְאַלְמָנוֹת הִנְנִי אֹמֵר טוֹב-לָהֶם כִּי יֵשְׁבוּ בְּגַפָּם כָּמֹנִי׃ 9 וְאִם-לֹא יַעַצְרוּ בְתַאֲוָתָם יִדְבְּקוּ אִישׁ בְּאִשָּׁה כִּי-טוֹב הַדֶּבֶק מִבְּעֹר בְּתַאֲוָתוֹ׃ 10 וְלַאֲשֶׁר בַּנְּשׂוּאִים הִנְנִי מְצַוֶּה אַךְ לֹא אָנֹכִי כִּי אִם-הָאָדוֹן לְבַל תִּפָּרֵד אִשָּׁה מִבַּעְלָהּ׃ 11 וְאִם-תִּפָּרֵד תֵּשֵׁב לְבַדָּהּ אוֹ תִתְרַצֶּה אֶל-בַּעְלָהּ וְאִישׁ אַל-יְשַׁלַּח אֶת-אִשְׁתּוֹ׃ 12 וְלִשְׁאָר הָאַחִים אֹמֵר אָנֹכִי וְלֹא הָאָדוֹן כִּי-תִהְיֶה לְאָח אִשָּׁה אֲשֶׁר אֵינֶנָּה מַאֲמֶנֶת וּרְצוֹנָהּ לָשֶׁבֶת עִמּוֹ אַל-יְשַׁלְּחֶנָּה׃ 13 וְאִשָּׁה כִּי-יִהְיֶה לָּהּ בַּעַל אֲשֶׁר אֵינֶנּוּ מַאֲמִין וּרְצוֹנוֹ לָשֶׁבֶת עִמָּהּ אַל-תַּעַזְבֶנּוּ׃ 14 כִּי הָאִישׁ אֲשֶׁר אֵינֶנּוּ מַאֲמִין יִקָּדֵשׁ בְּאִשְׁתּוֹ וְהָאִשָּׁה אֲשֶׁר אֵינֶנָּה מַאֲמֶנֶת תִּקָּדֵשׁ בְּבַעְלָהּ כִּי אִם-לֹא-כֵן יֵחָשְׁבוּ בְנֵיכֶם כִּטְמֵאִים אַךְ עַתָּה טְהוֹרִים הֵמָּה׃ 15 אֲבָל אִם-יִפָּרֵד הוּא אֲשֶׁר אֵינֶנּוּ מַאֲמִין יִפָּרֶד-לוֹ וְהָאָח וְהָאָחוֹת אֵינָם מְשֻׁעְבָּדִים עוֹד בְּמַצָּבָם כָּזֶה כִּי הָאֱלֹהִים קָרָא אֹתָנוּ לְשָׁלוֹם׃ 16 כִּי מַה-תֵּדְעִי אִשָּׁה אִם-תּוֹשִׁיעִי לְבַעְלֵךְ אוֹ מַה-תֵּדַע אַתָּה הָאִישׁ אִם-תּוֹשִׁיעַ לְאִשְׁתֶּךָ׃ 17 וְעַתָּה כָּל-אָדָם יִתְהַלֵּךְ רַק כְּפִי אֲשֶׁר-חָלַק לוֹ הָאָדוֹן וּכְפִי אֲשֶׁר-קְרָאוֹ אֱלֹהִים וְכֵן-מְצַוֶּה אֲנִי בְּכָל-הַקְּהִילּוֹת׃ 18 אִם-יִקָּרֵא אִישׁ נִמּוֹל אַל-יִמְשֹׁךְ אֶת-עָרְלָתוֹ וְאִם-עָרֵל הוּא אַל-יִמּוֹל׃ 19 הַמּוּלָה כְאַיִן כִּי אִם-מִשְׁמֶרֶת מִצְוַת אֱלֹהִים׃ 20 כָּל-אִישׁ עַל-מִשְׁמַרְתּוֹ יָקוּם לֹא יַעַזְבֶנָּה בְּהִקָּרְאוֹ׃ 21 אִם-נִקְרֵאתָ בִּהְיוֹתְךָ עֶבֶד אַל-תִּדְאַג וְאִם-תַּשִּׂיג יָדְךָ לָצֵאת לַחָפְשִׁי טוֹב-לָךְ כִּי תֵצֵא׃ 22 כִּי-עֶבֶד אֲשֶׁר הָאָדוֹן קְרָאוֹ בֶּן-חֹרִים הוּא לָאָדוֹן וּכְמוֹ-כֵן בֶּן-חֹרִים בְּהִקָּרְאוֹ עֶבֶד הוּא לַמָּשִׁיחַ׃ 23 בִּמְחִיר נִקְנֵיתֶם אַל-תִּהְיוּ עַבְדֵי אָדָם׃ 24 אַחַי כָּל-אִישׁ כַּאֲשֶׁר נִקְרָא יִשְׁמָר-לוֹ אֶת-מַעֲמָדוֹ הָרִאשׁוֹן לִפְנֵי הָאֱלֹהִים׃ 25 וְעַל-דְּבַר הַבְּתוּלוֹת אֵין-לִי מִצְוָה מִפִּי הָאָדוֹן רַק אֲחַוֶּה דַעְתִּי לָכֶם אַחֲרֵי אֲשֶׁר-הֱקִימַנִי הָאָדוֹן בְּחֶמְלָתוֹ לְאִישׁ אֱמוּנִים לְפָנָיו׃ 26 וְהִנְנִי אֹמֵר בְּצוֹק הָעִתִּים הַבָּאוֹת טוֹב וְנָכוֹן לָאָדָם לָשֶׁבֶת בַּאֲשֶׁר הוּא׃ 27 אִם-דָּבַקְתָּ בְאִשָּׁה אַל-תְּבָקֵּשׁ לְהִפָּרֵד מִמֶּנָּה וְאִם-נִפְרַדְתָּ מֵאִשָּׁה אַל-תְּבַקֵּשׁ אַחֶרֶת׃ 28 וְאִם-אִשָּׁה לָקַחְתָּ לָּךְ לֹא חָטָאתָ וּבְתוּלָה כִּי-תִבָּעֵל אֵין בָּהּ עָוֹן אַךְ-צָרָה תִמְצָאֵם וּבְשָׂרָם עֲלֵיהֶם יִכְאַב וַאֲנִי חֶמְלָה מָלֵתִי עֲלֵיכֶם׃ 29 כָּזֹאת אֲנִי אֹמֵר אַחַי כִּי הָעֵת לֹא תִמָּשֵׁךְ עוֹד עַד-אֲשֶׁר אֵלֶּה אֲשֶׁר נָשְׂאוּ לָהֶם נָשִׁים יִהְיוּ כַּאֲשֶׁר לֹא נָשָׂאוּ׃ 30 וְהַבֹּכִים כְּלֹא בֹכִים וְהַשְּׂמֵחִים כְּלֹא שְׂמֵחִים וְהַקֹּנִים כְּלֹא קָנוּ קִנְיָן׃ 31 וְהַמֹּצְצִים שְׁדֵי הָעוֹלָם הַזֶּה כְּאֵינָם מֹצְאִים כָּל-טַעַם כִּי תֹאַר הָעוֹלָם הַזֶּה כָּלִיל יַחֲלֹף׃ 32 וַאֲנִי חָפַצְתִּי לִמְנֹעַ דְּאָגָה מִכֶּם אִישׁ אֲשֶׁר אֵין-לוֹ אִשָּׁה דֹּאֵג לְחֶפְצֵי שָׁמַיִם אֵיךְ יִיטַב בְּעֵינֵי הָאָדוֹן׃ 33 וּבַעַל אִשָּׁה דֹּאֵג לְחֶפְצֵי הָאָרֶץ אֵיךְ יִיטַב בְּעֵינֵי הָאִשָּׁה׃ 34 וְכֵן נִבְדֶּלֶת אֵשֶׁת אִישׁ מִן-בְּתוּלָה זֹאת אֲשֶׁר לֹא-יָדְעָה אִישׁ דֹּאֶגֶת לְחֶפְצֵי הָאָדוֹן לִהְיוֹת טְהוֹרָה בְּנַפְשָׁהּ וּבְרוּחָהּ וּבְעֻלַת-בַּעַל דֹּאֶגֶת לְחֶפְצֵי הָאָרֶץ אֵיךְ תִּיטַב בְּעֵינֵי בַעְלָהּ׃ 35 וְכָזֹאת אֲנִי מְדַבֵּר לְהוֹעִיל לְנַפְשְׁכֶם לֹא לְהַשְׁלִיךְ מוֹקֵשׁ לִפְנֵיכֶם כִּי אִם-לְמַעַן תִּהְיוּ נְכֹנִים וְשֹׁקְדִים עַל-עֲבֹדַת אֲדֹנֵינוּ בְּאֵין מַעֲצוֹר׃ 36 וְכִי-יַחְשֹׁב אָדָם כִּי בִתּוֹ הַבְּתוּלָה תִּהְיֶה לְחֶרְפָּה אִם-יַעַבְרוּ יְמֵי נְעוּרֶיהָ וְכִי-הַדָּבָר נָחוּץ לְתִתָּהּ לְאִישׁ יַעֲשֶׂה כַּאֲשֶׁר עִם-לְבָבוֹ יִתְּנֶנָּה לְהִנָּשֵּׂא וְאֵין בּוֹ עָוֹן׃ 37 וְהוּא אֲשֶׁר עֹמֵד סָמוּךְ בְּלִבּוֹ אֵין מֵצִיק לוֹ וּמשֵׁל הוּא בִרְצוֹנוֹ וְיִגְזָר-אֹמֶר לִשְׁמֹר אֶת-בִּתּוֹ הַבְּתוּלָה הֵיטִיב לַעֲשׂוֹת׃ 38 עַל-כֵּן הַנֹּתֵן אֹתָהּ לְאִישׁ טוֹב עֹשֶׂה וַאֲשֶׁר אֵינֶנּוּ נֹתֵן אֹתָהּ עֹשֶׂה טוֹב מִמֶּנּוּ׃ 39 הָאִשָּׁה צְרוּרָה לְבַעֲלָהּ מִן-הַתּוֹרָה כָּל-עוֹד אִישָׁהּ חָי וְכִי-יִישַׁן הַמָּוֶת תּוּכַל לְהִנָּשֵׂא רַק לַאֲשֶׁר תִּבְחַר-בּוֹ לִפְנֵי הָאָדוֹן׃ 40 אוּלָם עַל-דַּעְתִּי אַשְׁרֶיהָ אִם-תֵּשֵׁב לְבַדָּהּ וּלְבָבִי יַחְשֹׁב כִּי גַם-בִּי רוּחַ אֱלֹהִים׃

ח    1 וְעַל-דְּבַר אֱלִילִים הֵן נוֹדַע כִּי יֶשׁ-דַּעַת לְכֻלָּנוּ אַךְ דַּעַת תוֹסִיף גַּאֲוָה וְאַהֲבָה מְשִׁיבַת נָפֶשׁ׃ 2 כִּי יַחְשָׁב-אִישׁ ךִּ-הוּא נְבוֹן דָּבָר עוֹד לֹא-יָבִין דָּבָר לַאֲשֻׁרוֹ כַּאֲשֶׁר נָכוֹן-לוֹ׃ 3 אֲבָל אִם-יֶאֱהַב אֶת-אֱלֹהִים אֱלֹהִים הוּא יְבוֹנְנֵהוּ׃ 4 וְעַל-דִּבְרַת אֹכֶל מִזִּבְחֵי הָאֱלִילִים יָדַעְנוּ כִּי-אֱלִיל כְּאַיִן הוּא בָּעוֹלָם וְכִי אֵין אֱלֹהִים זוּלָתִי אֶחָד׃ 5 וְאַף כִּי-יֵשׁ נִקְרָאִים אֱלֹהִים אִם-בַּשָּׁמַיִם וְאִם-בָּאָרֶץ כְּמוֹ הֵם אֱלֹהִים רַבִּים וַאֲדֹנִים רַבִּים׃ 6 בְּכָל-זֹאת לָנוּ רַק-אֱלֹהִים אֶחָד הוּא אֲבִי-עַד אֲשֶׁר מִמֶּנּוּ הַכֹּל וְלוֹ אֲנָחְנוּ וְאָדוֹן אֶחָד יֵשׁוּעַ הַמָּשִׁיחַ אֲשֶׁר הַכֹּל עַל-יָדוֹ וְעַל-יָדוֹ גַּם-אֲנָחְנוּ׃ 7 אַךְ לֹא כֻלָּם קָנוּ הַדַּעַת הַזֹּאת כִּי-יֵשׁ אֲשֶׁר לִבָּם פֹּנֶה אֶל-אֱלִילִים עַד-הַיּוֹם הַזֶּה וְאֹכְלִים מִזִּבְחָם אֲשֶׁר יַקְרִיבוּ לֶאֱלִיל עַד-אֲשֶׁר לִבָּם הַנָּבוּב יִטַּמָּא׃ 8 וְהִנֵּה אֹכֶל לֹא יְקָרְבֵנוּ אֶל-אֱלֹהִים אִם-לֹא נֹאכַל לֹא יְבוֹאֵנוּ חֶסֶר וְאִם-נֹאכַל לֹא-נִמְצָא יִתְרוֹן׃ 9 אַךְ הִשָּׁמְרוּ לָכֶם פֶּן-תִּתֵּן שְׁרִירוּת לִבְּכֶם מִכְשׁוֹל לְאֵין אוֹנִים׃ 10 כִּי אִם-אַתָּה אִישׁ דַּעַת וְתֵשֵׁב אֶל-הַשֻּׁלְחָן בְּהֵיכַל הָאֱלִילִים הֲלֹא רֹאֲךָ חֲסַר אוֹנִים יְפֻתֶּה בִלְבָבוֹ לֶאֱכֹל מִזִּבְחֵי הָאֱלִילִים׃ 11 וּבְכֵן בְּיִתְרוֹן דַעְתְּךָ יֹאבַד אָחִיךָ חֲסַר אוֹנִים אֲשֶׁר נָתַן הַמָּשִׁיחַ נַפְשׁוֹ בַּעֲדוֹ׃ 12 וְאִם-כָּכָה אַתֶּם חֹטְאִים לַאֲחֵיכֶם וּתְדַכְּאוּ אֶת-לִבָּם הַנָּבוּב לַמָּשִׁיחַ אַתֶּם חֹטְאִים׃ 13 עַל-כֵּן אִם-מַאֲכָלִי יִהְיֶה לְמוֹקֵשׁ לְאָחִי לֹא-אֹכַל בָּשָׂר לְעוֹלָם פֶּן-אָחִי יִוָּקֶשׁ-בּוֹ׃

ט    1 הֲכִי לֹא חָפְשִׁי אֲנִי הֲכִי לֹא-שָׁלִיחַ אָנִי הֲכִי לֹא רָאִיתִי אֶת-יֵשׁוּעַ הַמָּשִׁיחַ אֲדֹנֵינוּ אוֹ הַאֵין אַתֶּם פֹּעַל יָדַי בַּאדֹנֵינוּ׃ 2 אִם-אֵינֶנִּי שָׁלִיחַ לַאֲחֵרִים לָכֶם אֲנִי הוּא זֶה אַחֲרֵי אֲשֶׁר אַתֶּם כְּחוֹתָם בְּיָדִי לִפְנֵי אֲדֹנֵינוּ כִּי-צִיר שֻׁלָּח אָנִי׃ 3 וְכָזֹאת אֲנִי מִצְטַדֵּק נֶגֶד חֹקְרֵי מַעֲשָׂי׃ 4 הַאֵין שִׁלְטוֹן בְּיָדֵינוּ לֶאֱכֹל וְלִשְׁתּוֹת׃ 5 הַאֵין שִׁלְטוֹן בְּיָדֵינוּ לְהֹלִיךְ עִמָּנוּ אִשָּׁה מִבְּנוֹת בְּרִיתֵנוּ כְּיֶתֶר הַשְּׁלִיחִים וַאֲחֵי הָאָדוֹן וְכֵיפָא׃ 6 אוֹ הֲרַק-לִי וּלְבַר-נַבָּא לְבָד אֵין שִׁלְטוֹן לַחֲדֹל מִמְּלָאכָה׃ 7 מִי הוּא הַיֹּצֵא בַצָּבָא וְאֶת-נַפְשׁוֹ יְכַלְכֵּל מִשֶּׁלּוֹ מִי יִטַּע כֶּרֶם וְלֹא יֹאכַל מִפִּרְיוֹ אוֹ מִי יִרְעֶה צֹאן וְלֹא יֹאכַל מֵחֲלֵב הַצֹּאן׃ 8 הֲכִי רַק כְּדֶרֶךְ בְּנֵי אָדָם אֲנִי מְדַבֵּר כַּדְּבָרִים הָאֵלֶּה הֲלֹא גַם-הַתּוֹרָה אֹמֶרֶת כֵּן׃ 9 כִּי כָתוּב בְּתוֹרַת משֶׁה לֹא-תַחְסֹם שׁוֹר בְּדִישׁוֹ הֲלִשְׁוָרִים דֹּאֵג אֱלֹהִים׃ 10 אוֹ לְטוֹבָתֵנוּ דִּבֵּר כָּל-דְּבָרָיו אָכֵן לְטוֹבָתֵנוּ כָּתוּב זֶה כִּי הַחֹרֵשׁ יַחֲרשׁ בְּתִקְוָה וְהַדָּשׁ יָדוּשׁ בְּתִקְוָה כִּי יִקַּח חֶלְקוֹ׃ 11 וַאֲנַחְנוּ כִּי-זָרַעְנוּ בָכֶם זֶרַע שָׁמָיִם הֲרַב הוּא בְעֵינֵיכֶם כִּי-נִקְצֹר קְצִיר אָרֶץ׃ 12 וְאִם אֲחֵרִים יֶשׁ-לָהֶם חֵלֶק וּצְדָקָה בָּכֶם אַף כִּי אֲנָחְנוּ וּבְכַל-זֹאת לֹא נָגַעְנוּ בַּאֲשֶׁר לָכֶם כִּי אִם-סָבַלְנוּ כָל-סֵבֶל לְבִלְתִּי נְתֹן מַעְצָר לִבְשׂוֹרַת הַמָּשִׁיחַ׃ 13 הֵן יְדַעְתֶּם כִּי עֹבְדֵי עֲבֹדַת הַקֹּדֶשׁ אֹכְלִים מִן-הַקֹּדֶשׁ וּמְשָׁרְתֵי הַמִּזְבֵּחַ לֹקְחִים חֶלְקָם בַּמִּזְבֵּחַ׃ 14 וְכֵן צִוָּה גַם-הָאָדוֹן כִּי מְבַשְּׂרֵי הַבְּשׂוֹרָה עַל-הַבְּשׂוֹרָה יִחְיוּן׃ 15 וַאֲנִי בְּאַחַת מֵאֵלֶּה לֹא נָגַעְתִּי וְגַם לֹא-כָתַבְתִּי כָזֹאת לְבַעֲבוּר סַבֶּב-לִי אֶת-פְּנֵי הַדָּבָר כִּי-טוֹב לִי הַמָּוֶת מֵאֲשֶׁר יָשִׁית אִישׁ אֶת-תִּפְאַרְתִּי לָרִיק׃ 16 וְאִם מְבַשֵּׂר אָנֹכִי אֵין-לִי לְהִתְפָּאֵר כִּי-יָד חֲזָקָה תְּאַלְּצֵנִי וְאוֹי-לִי אִם-לֹא אֲבַשֵּׂר׃ 17 וְאִם בְּחֵפֶץ לֵב אֶעֱשֶׂה-זֹּאת יֵשׁ שָׂכָר לִפְעֻלָּתִי וְאִם בְּלֹא חֵפֶץ לֵב הֲלֹא כְהֻנַּת הַבְּשׂוֹרָה הָפְקְדָה אִתִּי׃ 18 וּמָה אֵפוֹא שְׂכָרִי הֲלֹא רַק לְבַשֵּׂר אֶת-בְּשׂוֹרַת הַמָּשִׁיחַ בְּלֹא-מְחִיר וְלֹא לִשְׁלֹט בַּאֲשֶׁר לָכֶם עֵקֶב בְּשׂוֹרָתִי׃ 19 וְאַף כִּי-חָפְשִׁי אֲנִי מִכָּל-אָדָם הָיִיתִי עֶבֶד לְכֻלָּם לְמַעַן קְנוֹת לֵב רַבִּים׃ 20 לַיְּהוּדִים הָיִיתִי כִּיהוּדִי לִקְנוֹת אֶת-הַיְהוּדִים לְבַעֲלֵי התּוֹרָה כְּבַעַל תּוֹרָה אַף כִּי לֹא-הָיִיתִי בַּעַל תּוֹרָה לִקְנוֹת אֶת-בַּעֲלֵי הַתּוֹרָה׃ 21 וְלָאֵלֶּה אֲשֶׁר הֵם בְּלֹא-תוֹרָה כְּמוֹ בְּלֹא-תוֹרָה אַף כִּי לֹא-הָיִיתִי בְּלֹא-תוֹרָה לִפְנֵי הָאֱלֹהִים כִּי תוֹרַת הַמָּשִׁיחַ תּוֹרָתִי לִקְנוֹת אֶת-אֵלֶּה אֲשֶׁר הֵם בְּלֹא-תוֹרָה׃ 22 לִרְפֵי יָדַיִם הָיִיתִי כִּרְפֵה יָדַיִם לִקְנוֹת אֶת-רְפֵי הַיָּדָיִם כֹּל הָיִיִתִי לַכֹּל לְמַעַן אוֹשִׁיעַ לִקְצָתָם מִכָּל-עֵבֶר וּפִנָּה׃ 23 וְכָל-אֵלֶּה אֲנִי עֹשֶׂה בַּעֲבוּר הַבְּשׂוֹרָה לְמַעַן יִהְיֶה חֶלְקִי בָּהּ׃ 24 הֵן יְדַעְתֶּם כִּי-בַמֵּרוֹץ יָרוּצוּ הָרָצִים כֻּלָּם וְרַק-אֶחָד מֵהֶם יַשִּׂיג אֶת-שְׂכַר הַמְנַצֵּחַ כָּכָה רוּצוּ וְהִשַּׂגְתֶּם אֶת-הַשָּׂכָר גַּם-אַתֶּם׃ 25 וְדֶרֶךְ עֹדְרֵי מַעֲרָכָה לְהִנָּזֵר מִכָּל-דָּבָר אֲשֶׁר לְיִתְרָה יֵחָשֵׁב וְהֵם רָצִים לַעֲטֶרֶת בַּת-חֲלוֹף וַאֲנַחְנוּ לַעֲטֶרֶת עוֹלָם׃ 26 וַאֲנִי כֹּה הִנְנִי רָץ וְלֹא כִמְמַשֵּׁשׁ בַּחֲשֵׁכָה כֹּה לֹחֵם בִּזְרֹעֹתַי וְלֹא כְּחֹצֵב בִּפְנֵי הָרוּחַ׃ 27 אַךְ אֲעַנֶּה אֶת-נַפְשִׁי וְאֶת-בְּשָׂרִי אֶכְבֹּשׁ פֶּן-אֶהְיֶה קֹרֵא לַאֲחֵרִים וּלְנַפְשִׁי יִקָּרֵא אֵין-חֶפְצִי-בָהּ׃

י    1 וַאֲנִי לֹא אַחֲרִישׁ מֵהוֹדִיעֲכֶם אֶחָי כִּי אֲבוֹתֵינוּ הָיוּ כֻלָם תַּחַת הֶעָנָן וְכֻלָּם עָבְרוּ בְּתוֹךְ הַיָּם׃ 2 וְכֻלָּם נִטְבְּלוּ בֶעָנָן וּבַיָּם לִפְנֵי משֶׁה׃ 3 וַיֹּאכְלוּ כֻלָּם מִן-לֶחֶם הַשָּׁמַיִם הַהוּא׃ 4 גַּם-שָׁתוּ כֻלָּם מִן-מַשְׁקֵה הַשָּׁמַיִם הַהוּא כִּי שָׁתוּ מִן-צוּר הַיְשׁוּעָה הַהֹלֵךְ אַחֲרֵיהֶם וְהַצּוּר הַזֶּה הוּא הַמָּשִׁיחַ׃ 5 אֲבָל רֻבָּם לֹא רָצָה בָם אֱלֹהִים כִּי-נָפְלוּ פִגְרֵיהֶם בַּמִּדְבָּר׃ 6 וְכָל-זֶה נִתַּן-לָנוּ לְמוֹפֵת לִבְלִי נִתְאֲוָה תַּאֲוָה רָעָה כַּאֲשֶׁר הִתְאַוּוּ הֵמָּה׃ 7 וְאֶת-הַפְּסִילִים לֹא תַעַבְדוּ כַּאֲשֶׁר עָבְדוּ אֲנָשִׁים מִקְצוֹתָם כַּכָּתוּב וַיֵּשֶׁב הָעָם לֶאֱכֹל וְשָׁתוֹ וַיָּקֻמוּ לְצַחֵק׃ 8 וְזֹנִים לֹא נִהְיֶה כַּאֲשֶׁר זָנוּ אֲנָשִׁים מֵהֶם וַיִּפְּלוּ בְּיוֹם אֶחָד שְׁלשָׁה וְעֶשְׂרִים אָלֶף׃ 9 וְאֶת-הַמָּשִׁיחַ לֹא נְנַסֶּה כַּאֲשֶׁר אֲנָשִׁים מֵהֶם נִסּוּ אֶת-יְהוָֹה וַיְנַשְּׁכוּם הַנְּחָשִׁים׃ 10 וְלֹא תִלֹּנוּ כַּאֲשֶׁר הֵלִינוּ אֲנָשִׁים מֵהֶם וַיֹּאבְדוּ בְּיַד הַמַּשְׁחִית׃ 11 וְכָל-אֵלֶּה מָצְאוּ אֹתָם לִהְיוֹת לְמוֹפֵת וְגַם-נִכְתְבוּ לְמוּסָר לָנוּ אֲשֶׁר בָּאנוּ עַד-קִצֵּי עוֹלָמִים׃ 12 עַל-כֵּן הַחשֵׁב כִּי הוּא עֹמֵד נָכוֹן יִזָּהֵר לְבִלְתִּי יִפֹּל׃ 13 עוֹד לֹא-עָבְרָה מַסָּה עֲלֵכֶם זוּלָתִי כַּאֲשֶׁר תִּמָּצֵא לִבְנֵי אָדָם וְנֶאֱמָן הוּא הָאֱלֹהִים אֲשֶׁר לֹא יִתֵּן לְנַסֹּתְכֶם יֶתֶר מִדֵּי כֹחֲכֶם וְגַם-בְּיוֹם מַסָּה יָכִין לָכֶם מִפְלָט כַּאֲשֶׁר תּוּכְלוּן שְׂאֵת׃ 14 לָכֵן אֲהוּבֵי נַפְשִׁי נוּסוּ מֵעֲבֹדַת אֱלִילִים׃ 15 הִנֵּה כְמוֹ אֶל-אֲנָשִׁים נְבוֹנִים אֲדַבְּרָה שִׁמְעוּ-נָא מִלָּתִי׃ 16 כּוֹס הַבְּרָכָה אֲשֶׁר עָלֶיהָ אָנוּ מְבָרְכִים הֲלֹא הִיא הַמְחַבֶּרֶת אֹתָנוּ אֶל-דַּם הַמָּשִׁיחַ וְהַלֶּחֶם אֲשֶׁר אָנוּ פֹרְסִים הֲלֹא הוּא הַמְחַבֵּר אֹתָנוּ אֶל-בְּשַׂר הַמָּשִׁיחַ׃ 17 כִּי אֲנַחְנוּ הָרַבִּים הָיִינוּ לְבָשָׂר אֶחָד כְּמוֹ לֶחֶם אֶחָד אַחֲרֵי אֲשֶׁר בְּלֶחֶם אֶחָד הָיִינוּ כֻלָּנוּ חֲבֵרִים׃ 18 רְאוּ אֶת-בְּנֵי יִשְׂרָאֵל בַּעֲבֹדָתָם עֲבֹדַת בְּשָׂרִים הֲלֹא אֹכְלֵי הַזְּבָחִים חֲבֵרִים הֵם בַּמִּזְבֵּחַ׃ 19 וּמָה אֲנִי אֹמֵר הֲכִי-זֶבַח אֱלִילִים שֹׁרֶשׁ דָּבָר בּוֹ אוֹ כִּי-אֱלִיל יֶשׁ-בּוֹ שֹׁרֶשׁ דָּבָר׃ 20 אֲבָל אֶת-אֲשֶׁר יִזְבְּחוּ הַגּוֹיִם לַשֵּׁדִים הֵם זֹבְחִים וְלֹא לֵאלֹהִים וְאֵין לִי חֵפֶץ כִּי-תִהְיוּ אַתֶּם חַבְרֵי הַשֵּׁדִים׃ 21 לֹא תוּכְלוּ לִשְׁתּוֹת מִכּוֹס הָאָדוֹן וּמִכּוֹס הַשֵּׁדִים לֹא תוּכְלוּ לְהִתְחַבֵּר לְשֻׁלְחָן הָאָדוֹן וּלְשֻׁלְחָן הַשֵּׁדִים׃ 22 אוֹ הֲכִי-נָעִיר חֲמַת קִנְאַת הָאָדוֹן הַבְּרָב-כֹּחַ יִגְבַּר אִישׁ עָלָיו׃ 23 הַכֹּל נָכוֹן לִי אֲבָל לֹא הַכֹּל לְהוֹעִיל הַכֹּל נָכוֹן אֲבָל לֹא הַכֹּל לְהִבָּנוֹת מִמֶּנּוּ׃ 24 אַל-יְבַקֵּשׁ אִישׁ טוֹבַת נַפְשׁוֹ לְבַדּוֹ כִּי אִם-גַּם-טוֹבַת רֵעֵהוּ׃ 25 כָּל-הַנִּמְכָּר בַּשּׁוּק אֹתוֹ תֹאכֵלוּ וְאַל-תִּדְרְשׁוּ לְחִקְרֵי-לֵב׃ 26 כִּי לַיהוָֹה הָאָרֶץ וּמְלוֹאָהּ׃ 27 וְאִם-יִקְרָא אֶתְכֶם אַחַד הָאֲנָשִׁים אֲשֶׁר אֵינָם מַאֲמִינִים וְתִרְצוּ לָלֶכֶת לְבֵיתוֹ אָכֹל תֹּאכְלוּ מִכָּל-אֲשֶׁר יוּשַׂם לִפְנֵיכֶם וְאַל-תִּדְרְשׁוּ לְחִקְרֵי-לֵב׃ 28 וְכִי-יֹאמַר אֲלֵיכֶם אִישׁ זֶה הוּא זֶבַח לֹא תֹאכְלוּ מִמֶּנּוּ בַּעֲבוּר זֶה אֲשֶׁר הִגִּיד לָכֶם וּבַעֲבוּר חִקְרֵי-לֵב כִּי לַיהוָֹה הָאָרֶץ וּמְלוֹאָהּ׃ 29 וַאֲנִי אֹמֵר חִקְרֵי-לֵב לֹא חִקְרֵי לִבְּךָ כִּי אִם-חִקְרֵי-לֵב הָאַחֵר כִּי לָמָּה-זֶּה תֵחָשֵׁב חֻפְשָׁתִי לַחֲטָאָה בְּמַחֲשֶׁבֶת לֵב אַחֵר׃ 30 אִם-אָכַלְתִּי וּבֵרַכְתִּי לָמָּה-זֶּה יְחָרְפֵנִי עַל-אֲשֶׁר אֲנִי מְבָרֵךְ׃ 31 עַל-כֵּן אִם תֹּאכְלוּ וְאִם-תִּשְׁתּוּ אוֹ תַעֲשׂוּ מְאוּמָה עֲשׂוּ כָל-מַעֲשֵׂיכֶם לִכְבוֹד אֱלֹהִים׃ 32 אַל-תִּהְיוּ לְמִכְשׁוֹל לִפְנֵי הַיְּהוּדִים וְלֹא לִפְנֵי הַיְּוָנִים וְלֹא לִפְנֵי קְהַל אֱלֹהִים׃ 33 כַּאֲשֶׁר גַּם-אָנֹכִי בְכָל-מַעֲשַׂי הִנְנִי לְהֵיטִיב לְכֻלָּם וְלֹא טוֹבַת נַפְשִׁי אֲנִי דֹרֵשׁ כִּי אִם-טוֹבַת רַבִּים לְמַעַן יוָּשֵׁעוּ׃

יא    1 וְעַתָּה לְכוּ אַחֲרָי כַּאֲשֶׁר אֲנִי הֹלֵךְ אַחֲרֵי הַמָּשִׁיח׃ 2 וְהִנְנִי מְשַׁבֵּחַ אֶתְכֶם כִּי-זְכַרְתֶּם אֹתִי בְּכָל-עֵת וְכִי-שְׁמַרְתֶּם אֶת-הַתּוֹרֹת הַנִּמְסָרוֹת כַּאֲשֶׁר מָסַרְתִּי לָכֶם׃ 3 אַךְ זֹאת חָפַצְתִּי כִּי-תֵדְעוּן כִּי-רֹאשׁ כָּל-אִישׁ הוּא הַמָּשִׁיחַ וְרֹאשׁ הָאִשָּׁה הוּא הָאִישׁ וְרֹאשׁ הַמָּשִׁיחַ הוּא הָאֱלֹהִים׃ 4 כָּל-אִישׁ אֲשֶׁר יִתְפַּלֵּל אוֹ יִתְנַבֵּא וְרֹאשׁוֹ מְכֻסֶּה בּוֹזֶה אֶת-רֹאשׁוֹ׃ 5 וְכָל-אִשָּׁה אֲשֶׁר תִּתְפַּלֵּל אוֹ תִתְנַבֵּא וְאֶת-רֹאשָׁהּ לֹא כִסְּתָה אֶת-רֹאשָׁהּ בָּזְתָה כְּמוֹ אִם-גִּלְּחָה אֶת-רֹאשָׁהּ׃ 6 כִּי אִם-הָאִשָּׁה לֹא תִתְכַּסֶּה לָמָּה גַם-לֹא תָגֹז רֹאשָׁהּ וְאִם-חֶרְפָּה הִיא לָאִשָּׁה לָגֹז אוֹ לְגַלַּח שַׂעֲרוֹתֶיהָ תִּתְכַּסֶּה׃ 7 וְהָאִישׁ אֵינֶנּוּ מְצֻוֶּה לְכַסּוֹת אֶת-רֹאשׁוֹ בִּהְיוֹתוֹ צֶלֶם אֱלֹהִים וּכְבוֹדוֹ אֲבָל הָאִשָּׁה הִיא כְבוֹד הָאִישׁ׃ 8 כִּי אֵין-הָאִישׁ לֻקַּח מִן-הָאִשָּׁה כִּי אִם-הָאִשָּׁה מִן-הָאִישׁ׃ 9 גַּם לֹא-נִבְרָא הָאִישׁ בַּעֲבוּר הָאִשָּׁה כִּי אִם-הָאִשָּׁה בַּעֲבוּר הָאִישׁ׃ 10 עַל-כֵּן חוֹבַת הָאִשָּׁה לָשֵׂאת כְּסוּת עַל-רֹאשָׁהּ מִפְּנֵי הַמַּלְאָכִים׃ 11 אָכֵן אֵין הָאִשָּׁה מִבַּלְעֲדֵי הָאִישׁ וְאֵין הָאִישׁ מִבַּלְעֲדֵי הָאִשָּׁה לִפְנֵי אֲדֹנֵינוּ׃ 12 כִּי כַּאֲשֶׁר הָאִשָּׁה מִן-הָאִישׁ כֵּן-גַּם-הָאִישׁ עַל-יְדֵי הָאִשָּׁה וְהַכֹּל מֵאֱלֹהִים׃ 13 שִׁפְטוּ-נָא בְנַפְשְׁכֶם הֲכִי נָאוָה לְאִשָּׁה בְּאֵין כַּסּוֹת רֹאשׁ לְהִתְפַּלֵּל אֶל-הָאֱלֹהִים׃ 14 הֵן גַּם-הַטֶּבַע יוֹרֶה לָכֶם כִּי חֶרְפָּה לְאִישׁ לְגַדֵּל פֶּרַע שְׂעַר רֹאשׁוֹ׃ 15 אֲבָל הָאִשָּׁה כִּי תְגַדֵּל פֶּרַע פְּאֵר הוּא לָהּ כִּי-לִכְסוּת נִתַּן לָהּ הַפָּרַע׃ 16 וְאִם-יִבְחַר אִישׁ לְעוֹרֵר מְדָנִים לֹא-זֹה הַדֶּרֶךְ לָנוּ וְלֹא לִקְהִלּוֹת הָאֱלֹהִים׃ 17 וְכַאֲשֶׁר אַשְׁמִיעֲכֶם פֹּה דְבָרָי לֹא אֲשַׁבֵּחַ אֶתְכֶם אַחֲרֵי אֲשֶׁר תִּקָּהֲלוּ יַחְדָּו לֹא לְטוֹבָה כִּי אִם-לְרָעָה׃ 18 וְזֶה תְּחִלַּת דְּבָרָי כַּאֲשֶׁר תִּקָּהֲלוּ בַקָּהָל הֵן שָׁמַעְתִּי כִּי-יֵשׁ מַחֲלֹקוֹת בֵּינֵיכֶם וּלְמִקְצַת הַשְּׁמוּעָה הֶאֱמָנְתִּי׃ 19 כִּי לֹא תֶחְדַּלְנָה הַמַּחֲלֹקוֹת מִקִּרְבְּכֶם לְמַעַן יִוָּדְעוּ הַנֶּאֱמָנִים בָּכֶם׃ 20 וְעַתָּה כַּאֲשֶׁר תִּתְאַסְּפוּ יַחְדָּו לֹא-זֹה הַדֶּרֶךְ לֶאֱכֹל מִלֶּחֶם הָאָדוֹן׃ 21 כִּי כָל-אִישׁ בַּכֵּרָה יַקְדִּים לֶאֱכֹל חֶלְקוֹ וְאֶחָד רָעֵב וְהַשֵּׁנִי שֹׁתֶה שִׁכּוֹר׃ 22 הַאֵין לָכֶם בָּתִּים לֶאֱכֹל וְלִשְׁתּוֹת שָׁמָּה אוֹ אִם-תָּבוּזוּ לִקְהַל הָאֱלֹהִים וְהוֹבִישׁ פְּנֵי אֵלֶּה אֲשֶׁר אֵין-בְּיָדָם מְאוּמָה מָה אֹמַר לָכֶם הֲכִי אֲשַׁבֵּחֲכֶם עֵקֶב זֹאת לֹא אֲשַׁבֵּחַ אֶתְכֶם׃ 23 כִּי אָנֹכִי מִן-הָאָדוֹן קִבַּלְתִּי כַּאֲשֶׁר גַּם-מָסַרְתִּי לָכֶם כִּי הָאָדוֹן יֵשׁוּעַ בַּלַּיְלָה אֲשֶׁר-הִסְגִּירוּ אֹתוֹ לָקַח לָחֶם׃ 24 וַיְבָרֵךְ וַיִּבְצַע וַיֹּאמַר קְחוּ אִכְלוּ זֶה הוּא בְשָׂרִי הַנִּבְצָע בַּעַדְכֶם זֹאת עֲשׂוּ לְזִכְרֹנִי׃ 25 וּכְמוֹ-כֵן אַחֲרֵי אָכְלָם לָקַח אֶת-הַכּוֹס וַיֹּאמַר הַכּוֹס הַזֹּאת הִיא הַבְּרִית הַחֲדָשָׁה בְּדָמִי זֹאת עֲשׂוּ בְּכָל-עֵת אֲשֶׁר תִּשְׁתּוּ לְזִכְרֹנִי׃ 26 כִּי בְכָל-עֵת אֲשֶׁר תֹּאכְלוּ אֶת-הַלֶּחֶם הַזֶּה וְשָׁתוֹ אֶת-הַכּוֹס הַזֹּאת תַּשְׁמִיעוּ מוֹת אֲדֹנֵינוּ עַד כִּי יָבוֹא׃ 27 עַל-כֵּן מִי אֲשֶׁר יֹאכַל מִלֶּחֶם הָאָדוֹן אוֹ-יִשְׁתֶּה מִכּוֹסוֹ וְלִבּוֹ לֹא נָכוֹן עִמּוֹ מָעַל מַעַל בִּבְשַׂר אֲדֹנֵינוּ וּבְדָמוֹ׃ 28 אֲבָל יִבְחַן אָדָם אֶת-נַפְשׁוֹ וְאָז מִן-הַלֶּחֶם יֹאכַל וּמִן-הַכּוֹס יִשְׁתֶּה׃ 29 כִּי הָאֹכֵל וְהַשֹּׁתֶה שֶׁלֹא כָרָאוּי אֹכֵל וְשֹׁתֶה לְאַשְׁמָתוֹ כִּי אֶת-בְּשַׁר הָאָדוֹן לֹא הִבְדִּיל לוֹ כַּמִּשְׁפָּט׃ 30 עַל-כֵּן רַבִּים נְכֵאִים וְחֹלִים בָּכֶם וְרַבִּים יְשֵׁנֵי עָפָר׃ 31 אָכֵן אִם-נִבְחַן אֶת-נַפְשֵׁנוּ לֹא נִשָּׁפֵט׃ 32 וְאַף אִם-נִשָּׁפֵט יַסֹּר יְיַסְּרֵנוּ יְהוָֹה לְמַעַן לֹא נֶאְשַׁם עִם-הָעוֹלָם׃ 33 לָכֵן אַחַי כַּאֲשֶׁר תִּתְאַסְּפוּ יַחְדָּו לֶאֱכֹל הוֹחִילוּ אִישׁ לְרֵעֵהוּ׃ 34 וּמִי אֲשֶׁר יִרְעַב יֹאכַל בְּבֵיתוֹ וְלֹא יִהְיֶה לָכֶם אָוֶן וַעֲצָרָה וְיֶתֶר הַדְּבָרִים אֶעֶרְכָה לִפְנֵיכֶם בְּבֹאִי׃

יב    1 וְעַל-דְּבַר מַתְּנוֹת הָרוּחַ אֶחָי אֵין אֶת-נַפְשִׁי לְהַעְלִים מִכֶּם דָּבָר׃ 2 אַתֶּם יְדַעְתֶּם כִּי לְפָנִים גּוֹיִם הֱיִיתֶם נִמְשָׁכִים אַחֲרֵי אֱלִילִים אִלְּמִים כַּאֲשֶׁר אַחֲרֵיהֶם נִמְשַׁכְתֶּם׃ 3 עַל-כֵּן אוֹדִיעַ לָכֶם כִּי אֵין אִישׁ אֲשֶׁר רוּחַ אֱלֹהִים דִּבֶּר-בּוֹ אֲשֶׁר יֹאמַר עַל-יֵשׁוּעַ כִּי חֵרֶם הוּא וְלֹא יוּכַל אִישׁ לִקְרֹא לְיֵשׁוּעַ בְּשֵׁם אָדוֹן אִם-לֹא בְרוּחַ הַקֹּדֶשׁ׃ 4 וְשֹׁנוֹת הֵנָּה מַתְּנוֹת הֶחָסֶד אֲבָל אֶחָד הוּא הָרוּחַ׃ 5 וְשֹׁנוֹת הֵנָּה עֲבֹדוֹת הַקֹּדֶשׁ אֲבָל אֶחָד הוּא הָאָדוֹן׃ 6 וְשֹׁנוֹת הֵנָּה הַפְּעֻלּוֹת אֲבָל אֶחָד הוּא הָאֱלֹהִים הַפֹּעֵל הַכֹּל בַּכֹּל׃ 7 וּלְכָל-אִישׁ וָאִישׁ נִתְּנָה הִתְגַּלּוֹת הָרוּחַ לְטוֹבַת כֻּלָּם׃ 8 יֵשׁ אֲשֶׁר יִנָּתֶן-לוֹ בָרוּחַ אִמְרֵי חָכְמָה וְאַחֵר יִנָּתֶן-לוֹ אִמְרֵי דַעַת בָּרוּחַ הַהוּא׃ 9 לְאַחֵר אֱמוּנָה בָּרוּחַ הַהוּא וּלְאַחֵר יִנָּתֵן לִרְפֹּא חָלָיִם בָּרוּחַ הַהוּא׃ 10 לָזֶה עֲלִילוֹת נִפְלָאוֹת וְלָזֶה דִּבְרֵי נְבוּאָה לָזֶה לִבְחֹן אֶת-הָרוּחוֹת לָזֶה לְדַבֵּר בִּלְשֹׁנוֹת שֹׁנוֹת וְלָזֶה פִּתְרוֹן לְשֹׁנוֹת׃ 11 וְאֶת-כָּל-אֵלֶּה פֹּעֵל הָרוּחַ הָאֶחָד הַהוּא הַנֹּתֵן לְאִישׁ אִישׁ מְנָת-חֶלְקוֹ לְפִי רְצוֹנוֹ׃ 12 כִּי כַּאֲשֶׁר הַגּוּף אֶחָד הוּא וּבוֹ אֵבָרִים רַבִּים וְכָל-אֵבָרֵי הַגּוּף אַף כִּי-רַבִּים הֵם כֻּלָּם גּוּף אֶחָד כֵּן גַּם-הַמָּשִׁיחַ׃ 13 כִּי גַם-אֲנַחְנוּ נִטְבַּלְנוּ כֻלָּנוּ בְּרוּחַ אֶחָד לְגוּף אֶחָד אִם-יְהוּדִים אִם-יְוָנִים אִם-עֲבָדִים אוֹ בְנֵי חוֹרִים וְרוּחַ אֶחָד הִשְׁקָה אֹתָנוּ כֻּלָּנוּ׃ 14 כִּי הַגּוּף לֹא אֵבֶר אֶחָד הוּא כִּי אִם-אֵבָרִים רַבִּים׃ 15 אִם-תֹּאמַר הָרֶגֶל אַחֲרֵי אֲשֶׁר לֹא יָד אֲנִי אֵינֶנִּי מִן-הַגּוּף הַבַעֲבוּר זֹאת לֹא מִן-הַגּוּף הִיא׃ 16 וְאִם-תֹּאמַר הָאֹזֶן אַחֲרֵי אֲשֶׁר לֹא עַיִן אֲנִי אֵינֶנִּי מִן-הַגּוּף הֲבַעֲבוּר זֹאת לֹא מִן-הַגּוּף הִיא׃ 17 אִם-הַגּוּף כֻּלּוֹ יִהְיֶה עַיִן אַיֵּה יִהְיֶה אָז הַשֶּׁמַע וְאִם-כֻּלּוֹ יִהְיֶה שֶׁמַע אַיֵּה יִהְיֶה אָז הָרֵיחַ׃ 18 וְעַתָּה שָׂם אֱלֹהִים אֶת-הָאֶבָרִים אֵבֶר אֵבֶר בַּגּוּף לְפִי רְצוֹנוֹ׃ 19 לוּ-הָיוּ כֻלָּם אֵבָר אֶחָד אֵיכָה יִהְיֶה אָז הַגּוּף׃ 20 וְהִנֵּה אֵפוֹא הָאֵבָרִים רַבִּים הֵם וְהַגּוּף אֶחָד׃ 21 וְלֹא תוּכַל הָעַיִן לֵאמֹר אֶל-הַיָּד אֵין לִי דְבַר חֵפֶץ בָּךְ וְגַם לֹא הָרֹאשׁ אֶל-הָרַגְלַיִם לֵאמֹר דְּבַר חֵפֶץ לִי בָכֵן אָיִן׃ 22 אַף גַּם-נוֹסָפוֹת נִמְצָא כָּל-עוֹד יֵרָאוּ אֵבָרֵי הַגּוּף כְּרָפִים כֵּן דְּרוּשִׁים הֵם לַחֲפָצֵינוּ עַד-מְאֹד׃ 23 וְאֶת-אֵלֶּה אֲשֶׁר נְחַשֵּׁב כְּאִי-כָבוֹד בַּגּוּף לָהֶם נִתַּן כָּבוֹד רָב וְלִמְבֻשֵׁינוּ עוֹד יֶתֶר שְׂאֵת׃ 24 כִּי לַחֲלָקִים הַיָּפִים בָּנוּ אֵין מַחְסוֹר אָכֵן מַעַרְכֵי הַגּוּף עָרַךְ אֱלֹהִים וַיִּתֵּן כָּבוֹד רָב לְאִי-כָבוֹד׃ 25 לְבִלְתִּי תִהְיֶה מַחֲלֹקֶת בַּגּוּף וּלְמַעַן יִדְאֲגוּ הָאֵבָרִים זֶה לָזֶה׃ 26 אִם-יִתְעַנֶּה אֵבָר אֶחָד יִתְעַנּוּ כָּל-הָאֵבָרִים עִמּוֹ וְאִם-יְכֻבַּד אֵבָר אֶחָד יָשִׂישׂוּ עִמּוֹ כָּל-הָאֵבָרִים׃ 27 וְאַתֶּם גּוּף הַמָּשִׁיחַ וְאֵבָרָיו כָּל-אֶחָד בְּחֶלְקוֹ׃ 28 וּמֵהֶם הֵקִים אֱלֹהִים בְּתוֹךְ הָעֵדָה בָּרִאשֹׁנָה שְׁלִיחִים בַּשֵּׁנִית נְבִיאִים בַּשְּׁלִישִׁית מוֹרִים וְאַחֲרֵי-כֵן אֵלֶּה אֲשֶׁר נָתַן לָהֶם לַעֲשׂוֹת נִפְלָאוֹת לִרְפֹּא חֳלָיִם לְהָבִיא עֶזְרָה לַעֲמֹד בְּרֹאשׁ הָעֵדָה וּלְדַבֵּר בִּלְשֹׁנוֹת שֹׁנוֹת׃ 29 הֲכֻלָּם שְׁלִיחִים אִם-כֻּלָּם נְבִיאִים אוֹ כֻלָּם מוֹרִים אוֹ עֹשֵׂי נִפְלָאוֹת׃ 30 הַלְכֻלָּם נָתַן לִרְפֹּא חֳלָיִם אוֹ לְדַבֵּר בִּלְשֹׁנוֹת אוֹ לִפְתֹּר לְשֹׁנוֹת׃ 31 וְאַתֶּם בַּקְּשׁוּ בִּכָל-מְאֹדְכֶם מַתָּנוֹת טוֹבוֹת אֵלֶּה וַאֲנִי אוֹרֶה לָכֶם דֶּרֶךְ מְאֹד נַעֲלָה׃

יג    1 אִם-בִּשְׂפַת אֲנָשִׁים אוֹ מַלְאָכִים אֲדַבֵּר וְאַהֲבָה אֵין-בִּי אָז נְחשֶׁת הֹמִיָּה אֲנִי אוֹ צִלְצְלֵי תְרוּעָה׃ 2 וְאִם-נְבוּאָה בִי וְכָל-רָז אֲנִי מֵבִין וְכָל-דַּעַת וְאִם-אֱמוּנָה כֻלָּהּ לִי הִיא לְהַעְתִּיק הָרִים מִמְּקוֹמָם וְאַהֲבָה אֵין-בִּי אֲנִי אָז כְּאָיִן׃ 3 אִם-אֲפַזֵּר כָּל-הוֹנִי לִרְעֵבִים וְאֶת-בְּשָׂרִי אֶתֵּן לְמַאֲכֹלֶת אֵשׁ וְאַהֲבָה אֵין-בִּי כָּל-זֶה לֹא יוֹעִילֵנִי מְאוּמָה׃ 4 הָאַהֲבָה תַאֲרִיךְ אַף וּמְלֵאָה חֲנִינָה הָאַהֲבָה לֹא תְקַנֵּא הָאַהֲבָה לֹא תִתְנַשֵּׂא וְלֹא תִלְבַּשׁ גֵּאוּת׃ 5 לֹא יִמָּצֵא בָהּ שֶׁמֶץ-דָּבָר וְלֹא תְבַקֵּשׁ אֵת אֲשֶׁר-לָהּ לֹא תִתְקַצֵּף וְלֹא תַחֲרשׁ רָעָה׃ 6 לֹא תָשִׂישׂ בְּעַוְלָתָה כִּי אִם-מְשׂוֹשָׂהּ עֲלֵי-אֱמֶת׃ 7 כָּל-דָּבָר תִּשָּׂא כָּל-דָּבָר תַּאֲמִין כָּל-דָּבָר תְּקַוֶּה וּלְכָל-דָּבָר תִּטֶּה שִׁכְמָהּ לִסְבֹּל׃ 8 הָאַהֲבָה לֹא-תֶחְדַּל לָנֶצַח אַף כִּי-נְבוּאוֹת תִּכְלֶינָה וּלְשֹׁנוֹת תִּכָּחַדְנָה וְדַעַת אֵין-עוֹד׃ 9 כִּי-אַךְ חֵלֶק קָטֹן יָדָעְנוּ וְחֵלֶק קָטֹן נִבֵּאנוּ׃ 10 וְכַאֲשֶׁר בּוֹא תָבוֹא תַכְלִית כָּל-אֵלֶּה הַחֵלֶק הַקָּטֹן יַחֲלֹף׃ 11 בְּעוֹד יֶלֶד הָיִיתִי דִּבַּרְתִּי כְיֶלֶד בִּינוֹתִי כְיֶלֶד וְהָגִיתִי כְיָלֶד וְכַאֲשֶׁר הָיִיתִי לְאִישׁ הֲסִרֹתִי מֵעָלַי דִּבְרֵי יַלְדוּת׃ 12 כִּי עַתָּה רֹאִים אֲנַחְנוּ בְּמַרְאָה וּבְחִידֹת וְאָז נִרְאֶה פָּנִים אֶל-פָּנִים עַתָּה יָדַעְתִּי חֵלֶק קָטֹן וְאָז אֵדַע כַּאֲשֶׁר נוֹדַעְתִּי גַם-אָנִי׃ 13 וְעַתָּה תַעֲמֹדְנָה שְׁלָשׁ-אֵלֶּה אֱמוּנָה תִּקְוָה וְאַהֲבָה וְהַגְּדֹלָה בָהֵן הִיא הָאַהֲבָה׃

יד    1 וְאַתֶּם רִדְפוּ אַהֲבָה בַּקְּשׁוּ בְכָל-מְאֹדְכֶם מַתְּנוֹת הָרוּחַ וְעַל-כָּל-אֵלֶּה לְהִתְנַבְּאוֹת׃ 2 כִּי הַמְדַבֵּר בְּלַעֲגֵי לָשׁוֹן לֹא אֶל-אֲנָשִׁים הוּא מְדַבֵּר כִּי אִם-אֶל-אֱלֹהִים כִּי אֵין-אִישׁ שֹׁמֵעַ וְהוּא יַבִּיעַ חִידוֹת בָּרוּחַ׃ 3 וְהַמִּתְנַבֵּא מַטִּיף לַאֲנָשִׁים דְּבָרִים מְשִׁיבֵי נָפֶשׁ מוּסָר טוֹב וְדִבְרֵי נִחֻמִים׃ 4 הַמְדַבֵּר בַּלָּשׁוֹן יָשִׁיב נַפְשׁוֹ וְהַמִּתְנַבֵּא יָשִׁיב נֶפֶשׁ הָעֵדָה׃ 5 וּמִי יִתֵּן וְהָיָה מַתָּן הַלְּשֹׁנוֹת לְכֻלְּכֶם וְאַף עוֹד יֹתֵר כִּי-תִהְיוּ כֻלְּכֶם נְבִיאִים כִּי גָדוֹל הַמִּתְנַבֵּא מִבַּעַל הַלָּשׁוֹן זוּלָתִי אִם-יִפְתֹּר דְּבָרָיו וַעֲדָתוֹ תִּבָּנֶה מִמֶּנּוּ׃ 6 וְעַתָּה כִּי-אָבוֹא אֲלֵיכֶם אַחַי וְכִי-אֲדַבֵּר בִּלְשֹׁנוֹת מָה-אוֹעִיל לָכֶם אִם-לֹא אֲדַבֵּר דְּבָרַי כְּחֹזֶה אוֹ מוֹרֶה דֵעָה כְּנָבִיא אוֹ מֵבִין שְׁמוּעָה׃ 7 גַּם-כֵּלִים נֹתְנֵי קוֹל אֲשֶׁר אֵין בָּהֶם נִשְׁמַת חַיִּים כְּמוֹ חָלִיל אוֹ כִנּוֹר אִם-לֹא יִתְּנוּ קוֹל מְפֹרָשׁ מִי יָבִין מַה-יֶּהֱמֶה הֶחָלִיל אוֹ מַה-יֶּהְגֶּה הַכִּנּוֹר׃ 8 גַּם-הַשּׁוֹפָר אִם-יִתֶּן-קוֹל בִּלְתִּי בָרוּר מִי יֵחָלֵץ לַמִּלְחָמָה׃ 9 וְכֵן גַּם-אַתֶּם אִם לֹא-תוֹצִיאוּ בִלְשׁוֹנְכֶם מִלִּים בְּרֻרוֹת מִי יָבִין מוֹצָא שְׂפָתֵיכֶם הֲלֹא תִהְיוּ אָז כִּמְדַבְּרִים אֶל-הָרוּחַ׃ 10 לוּ תִהְיֶינָה לְשֹׁנוֹת רַבּוֹת כָהֵנָּה וְכָהֵנָּה בָּאָרֶץ לֹא תִמָּצֵא אַחַת מֵהֶן עֲמֻקָּה מֵהָבִין קוֹל מִלֶּיהָ׃ 11 וְאִם-אֲנִי אֵינֶנִּי מֵבִין פֵּשֶׁר הַמִּלּוֹת אָז אֶהְיֶה בְעֵינֵי הַמְדַבֵּר כְּנִלְעַג לָשׁוֹן וְכֵן יִהְיֶה בְעֵינַי גַּם-הוּא׃ 12 כֵּן גַּם-אַתֶּם בְּבַקֶּשְׁכֶם מַתְּנוֹת הָרוּחַ דִּרְשׁוּ טוֹבֹת הָעֵדָה לְכוֹנְנָהּ בְּיֶתֶר עֹז׃ 13 לָכֵן הַמְדַבֵּר בַּלָּשׁוֹן יִתְפַּלֵּל לִהְיוֹת גַּם-פֹּתֵר דְּבָרָיו׃ 14 וְאַף אִם-אֶתְפַּלֵּל בַּלָּשׁוֹן רוּחַ שְׂפָתַי יִתְפַּלֵּל וּתְבוּנַת לִבִּי לֹא תָנוּב תְּנוּבָה׃ 15 וּמָה אֵפוֹא עַתָּה אֶתְפַּלְלָה בְרוּחַ שְׂפָתַי וְאֶתְפַּלְלָה גַם-בִּתְבוּנַת לִבִּי אֲזַמְּרָה בְרוּחַ שְׂפָתַי וַאֲזַמְּרָה גַם-בִּתְבוּנַת לִבִּי׃ 16 כִּי-לוּלֵא כֵן כַּאֲשֶׁר תְּבָרֵךְ בְּרוּחַ שְׂפָתֶיךָ וְהֶדְיוֹט עֹמֵד בִּמְקוֹמוֹ לְפָנֶיךָ אֵיךְ יַעֲנֶה אָמֵן לְבִרְכָתְךָ בִּבְלִי דַעַת מָה אַתָּה אֹמֵר׃ 17 אָמְנָם אַתָּה תֵיטִיב כִּי-תְבָרֵךְ אַךְ רֵעֲךָ לֹא יִבָּנֶה מִמֶּךָ׃ 18 אוֹדֶה לֵאלֹהִים כִּי יֶשׁ-לִי מַתַּת הַלָּשׁוֹן יֶתֶר עַל-כֻּלְּכֶם׃ 19 אֲבָל בַּקָּהָל אֶבְחַר לְדַבֵּר חָמֵשׁ מִלִּים בִּתְבוּנַת לִבִּי לְהוֹרֹת אֶת-הַשֹּׁמְעִים מֵרִבֲבוֹת מִלִּים בְּלַעֲגֵי לָשׁוֹן׃ 20 אַחַי אַל-תִּהְיוּ כִילָדִי בַּבִּינָה וְרַק כִּילָדִים אַל-תָּרֵעוּ אַךְ בַּבִּינָה הֱיוּ שְׁלֵמִים׃ 21 כָּתוּב בַּתּוֹרָה כִּי בְּלַעֲגֵי שָׂפָה וּבְלָשׁוֹן אַחֶרֶת אֲדַבֵּר אֶל-הָעָם הַזֶּה וְגַם-בְּזֹאת לֹא-אָבוּא שְׁמוֹעַ אֵלַי אָמַר יְהוָֹה׃ 22 עַל-כֵּן הַלְּשֹׁנוֹת הֵן לְאוֹת לֹא לַמַּאֲמִינִים כִּי אִם-לְאֵינָם מַאֲמִינִים וְהַנְּבוּאָה אֵינֶנָּה לְאֵינָם מַאֲמִינִים כִּי אִם-לַמַּאֲמִינִים׃ 23 וְהִנֵּה אִם-תִּקָּהֵל כָּל-הָעֵדָה כְּאֶחָד וְכֻלָּם יְדַבְּרוּ בִלְשֹׁנוֹת וּבָאוּ שָׁמָּה הֶדְיוֹטִים אוֹ אֲנָשִׁים אֵינָם מַאֲמִינִים הֲלֹא יֹאמְרוּ כִּי-מְשֻׁגָּעִים אַתֶּם׃ 24 אַךְ אִם-יִתְנַבְּאוּ כֻלָּם וּבָא שָׁמָּה חֲסַר אֱמוּנָה אוֹ הֶדְיוֹט הוּא יִשְׁמַע תּוֹכַחַת מִפִּי כֻלָּם וּמִשְׁפָּט מִפִּי כֻלָם׃ 25 וּבְכֵן סִתְרֵי לִבּוֹ יִגָּלוּ וְהוּא יִפֹּל עַל-אַפָּיו אַרְצָה יִשְׁתַּחֲוֶה לֵאלֹהִים וְיַעֲנֶה לֵאמֹר אָכֵן יֵשׁ אֱלֹהִים בְּקִרְבְּכֶם׃ 26 וְעַתָּה מָה-אֵפוֹא אֶחָי כַּאֲשֶׁר תִּקָּהֲלוּ יַחְדָּו וְכָל-אִישׁ מִכֶּם יֶשׁ-אִתּוֹ מִזְמֹר אוֹ מוּסָר בְּפִיו אוֹ דְבַר חָזוֹן אוֹ נִיב לָשׁוֹן אוֹ פֵשֶׁר דָּבָר יְהִי הַכֹּל לְטוֹבַת הַקָּהָל׃ 27 וְכִי-יְדַבֵּר אִישׁ בַּלָּשׁוֹן יִהְיוּ הַמְדַבְּרִים שְׁנַיִם אוֹ שְׁלֹשָׁה וְלֹא יֹתֵר וְזֶה אַחַר זֶה יְדַבֵּרוּ וְאֶחָד יִפְתֹּר׃ 28 וְאִם-אֵין פֹּתֵר אָז יִדֹּם בַּקָּהָל וְאֶל-נַפְשׁוֹ וְאֶל-אֱלֹהִים יְדַבֵּר׃ 29 וְהַנְּבִיאִים יְדַבְּרוּ שְׁנַיִם אוֹ שְׁלשָׁה וְהַנִּשְׁאָרִים יִבְחֲנוּ דִבְרֵיהֶם׃ 30 וְכִי נִגְלָה דָבָר לְאַחַד הַיּשְׁבִים שָׁם אָז יִשְׁתֹּק הָרִאשׁוֹן׃ 31 כִּי תוּכְלוּ כֻלְּכֶם לְהִתְנַבְּאוֹת זֶה אַחַר זֶה לְמַעַן יִלְמְדוּ כֻלָּם וְכֻלָּם יְנֻחָמוּ׃ 32 הֲלֹא רוּחוֹת הַנְּבִיאִים עֲצוּרִים לְפִי חֵפֶץ הַנְּבִיאִים׃ 33 כִּי אֱלֹהִים לֹא אֱלֹהֵי הַמְּבוּכָה הוּא כִּי אִם-אֱלֹהֵי הַשָּׁלוֹם כְּמוֹ בְכָל-קְהִלּוֹת הַקְּדוֹשִׁים׃ 34 נְשֵׁיכֶם תִּשְׁתֹּקְנָה בַקָּהָל כִּי אֵין-לָהֶן רִשְׁיוֹן לְדַבֶּר שָׁם כִּי אִם-לְהִכָּנַע כַּאֲשֶׁר אֹמֶרֶת גַּם-הַתּוֹרָה׃ 35 וְאִם-חֶפְצָן לִלְמֹד דָּבָר תִּשְׁאַלְנָה אֶת-בַּעֲלֵיהֶן בַּבָּיִת כִּי-חֶרְפָּה הִיא לְאִשָּׁה לְדַבֵּר בַּקָּהָל׃ 36 אוֹ מַה-תַּחְשְׁבוּ הֲמִכֶּם יֵצֵא דְבַר אֱלֹהִים אוֹ בָא אֲלֵיכֶם לְבַדְּכֶם׃ 37 אִישׁ כִּי-יִתְחַשֵּׁב לְנָבִיא אוֹ אִישׁ אֲשֶׁר רוּחַ בּוֹ בִּין יָבִין אֵת אֲשֶׁר-אֲנִי כֹתֵב אֲלֵיכֶם כִּי-מִצְוַת הָאָדוֹן הִיא׃ 38 וּמִי אֲשֶׁר לֹא יָבִין זֹאת לֹא יָבִין׃ 39 עַל-כֵּן אַחַי בַּקְּשׁוּ בְכָל-מְאֹדְכֶם לְהִתְנַבֵּא וּמִדַּבֵּר בִּלְשֹׁנוֹת אַל-תִּכְלָאוּ׃ 40 אַךְ הַכֹּל כַּמִּשְׁפָּט יֵעָשֶׂה וּבִסְדָרִים נְכֹנִים׃

טו    1 וַאֲנִי הִנְנִי מוֹדִיעַ לָכֶם אַחַי עוֹד הַפַּעַם אֶת-הַבְּשׁרָה אֲשֶׁר קָרָאתִי בְאָזְנֵיכֶם הֲלֹא הִיא אֲשֶׁר קִבַּלְתֶּם וּבָהּ אַתֶּם דְּבֵקִים׃ 2 וְגַם-בָּהּ תִּוָּשְׁעוּן אִם-תַּחֲזִיקוּ בַדָּבָר כַּאֲשֶׁר הִגַּדְתִּי לָכֶם כִּי-לוּלֵא כֵן הֶאֱמַנְתֶּם לָרִיק׃ 3 בְּרֵאשִׁית כָּל-דָּבָר מָסַרְתִּי לָכֶם כַּאֲשֶׁר גַּם-אָנֹכִי קִבַּלְתִּי כִּי-מֵת הַמָּשִׁיחַ בַּעֲוֹנֵינוּ כְּפִי כִתְבֵי הַקֹּדֶשׁ׃ 4 וְכִי נִקְבַּר וַיָּקָם בַּיּוֹם הַשְּׁלִישִׁי כְּפִי כִתְבֵי הַקֹּדֶשׁ׃ 5 וְכִי נִרְאָה אֶל-כֵּיפָא וְאַחֲרֵי-כֵן אֶל-שְׁנֵים הֶעָשָׂר׃ 6 וְאַחֲרֵי-כֵן נִרְאָה אֶל-יֹתֵר מֵחֲמֵשׁ מֵאוֹת אַחִים כְּאֶחָד אֲשֶׁר רֻבָּם עוֹדָם חַיִּים עַד-הַיּוֹם הַזֶּה וּמִקְצָתָם נָמוּ שְׁנָתָם׃ 7 וְאַחֲרֵי-כֵן נִרְאָה אֶל-יַעֲקֹב וְאַחֲרֵי-כֵן אֶל-הַשְּׁלִיחִים כֻּלָּם׃ 8 וְאַחַר נִרְאֶה גַם-אֵלָי אֲשֶׁר-כְּנֵפֶל אָנֹכִי׃ 9 כִּי צָעִיר אֲנִי בֵּין הַשְּׁלִיחִים עַד אֲשֶׁר-קָטֹנְתִּי מֵהִקָּרֵא שָׁלִיחַ כִּי רָדַפְתִּי אֶת-עֲדַת אֱלֹהִים׃ 10 אֲבָל בְּחֶסֶד אֱלֹהִים הִנְנִי כַּאֲשֶׁר אָנִי וְחָסְדּוֹ עָלַי לֹא-הָיָה לָרִיק כִּי-יֹתֵר מִכֻּלָּם עָמַלְתִּי וְלֹא אֲנִי כִּי אִם-חֶסֶד אֱלֹהִים אֲשֶׁר עִמָּדִי׃ 11 וְעַתָּה אִם אֲנִי אוֹ הֵם כָּזֹאת אָנוּ קֹרִאים וְכָזֹאת אַתֶּם הֶאֱמַנְתֶּם׃ 12 וְאַחֲרֵי אֲשֶׁר נִקְרָא כִּי-הַמָּשִׁיחַ קָם מִן-הַמֵּתִים אֵיךְ יֹאמְרוּ אֲנָשִׁים מִכֶּם כִּי-תְקוּמָה לַמֵּתִים אָיִן׃ 13 וְאִם-אֵין תְּקוּמָה לַמֵּתִים גַּם-הַמָּשִׁיחַ לֹא קָם׃ 14 וְאִם לֹא קָם הַמָּשִׁיחַ אָז הֶבֶל קְרִיאָתֵנוּ וְהֶבֶל גַּם-אֱמוּנַתְכֶם׃ 15 וְאַף נִמָּצֵא עֵדֵי שֶׁקֶר לֵאלֹהִים אַחֲרֵי אֲשֶׁר עֵדִים הָיִינוּ לֵאלֹהִים כִּי הֵקִים אֶת-הַמָּשִׁיחַ וְלֹא הֲקִימוֹ אִם-אֱמֶת הַדָּבָר כִּי-הַמֵּתִים לֹא יָקוּמוּ׃ 16 כִּי אִם-לֹא יָקוּמוּ הַמֵּתִים גַּם-הַמָּשִׁיחַ לֹא קָם׃ 17 וְאִם לֹא קָם הַמָּשִׁיחַ אֱמוּנַתְכֶם הֶבֶל וַחֲטָאֵיכֶם עוֹדָם עֲלֵיכֶם׃ 18 וְאַף הַיְשֵׁנִים בַּמָּשִׁיחַ אָבַד נִצְחָם׃ 19 אִם-רַק בַּחַיִּים הָאֵלֶּה שַׂמְנוּ מַחְסֵנוּ בַּמָּשִׁיחַ אָז עֲנִיִּים מְרוּדִים אֲנַחְנוּ מִכָּל-אָדָם׃ 20 וְעַתָּה הַמָּשִׁיחַ הִנּוֹ קָם מִן-הַמֵּתִים רֵאשִׁית הַבִּכּוּרִים מִן-יְשֵׁנֵי הַמָּוֶת׃ 21 כִּי-כַאֲשֶׁר הַמָּוֶת בָּא עַל-יְדֵי אָדָם כֵּן עַל-יְדֵי אָדָם תְּקוּמַת הַמֵּתִים׃ 22 וְכַאֲשֶׁר כֻּלָּם מֵתוּ בָאָדָם כֵּן כֻּלָּם יִחְיוּ בַּמָּשִׁיחַ׃ 23 וְאִישׁ אִישׁ בְּסֵדֶר נָכוֹן-לוֹ הַמָּשִׁיחַ הוּא רֵאשִׁית הַבִּכּוּרִים וְאַחֲרֵי-כֵן הַמַּאֲמִינִים בַּמָּשִׁיחַ יָקוּמוּ לְעֵת בּוֹאוֹ׃ 24 אַחֲרֵי-כֵן הַקֵּץ בַּהֲשִׁיבוֹ אֶת-הַמַּלְכוּת אֶל-הָאֱלֹהִים הָאָב בַּיּוֹם אֲשֶׁר יַכְחִיד כָּל-מִשְׂרָה וְכָל-שִׁלְטוֹן וּגְבוּרָה׃ 25 כִּי-הוּא מָלֹךְ יִמְלֹךְ עַד כִּי-יָשִׁית כָּל-אֹיְבָיו תַּחַת רַגְלָיו׃ 26 וְהָאֹיֵב הָאַחֲרוֹן אֲשֶׁר יִכָּחֵד הוּא הַמָּוֶת׃ 27 כִּי-כֹל שָׁת תַּחַת רַגְלָיו וְכַאֲשֶׁר נֶאֱמַר כֹּל שַׁתָּה תַּחַת רַגְלָיו מוּדַעַת זֹאת כִּי-הַכֹּל הוּשַׁת תַּחְתָּיו מִלְּבַד הַשָּׁת כֹּל׃ 28 וְכַאֲשֶׁר יִכְבּשׁ אֶת-כֹּל אָז גַּם-הַבֵּן יוּשַׁת תַּחַת הַשָּׁת-כֹּל תַּחַת רַגְלָיו לְמַעַן יִהְיֶה הָאֱלֹהִים הַכֹּל בַּכֹּל׃ 29 אִם לֹא-כֵן אִם אֵין תְּקוּמָה לַמֵּתִים מַה-יּוֹעִילוּ הַנִּטְבָּלִים בְּעַד הַמֵּתִים לָמָּה-זֶּה יִטָּבְלוּ בַעֲדָם וְהֵם לֹא יָקוּמוּ לְעוֹלָם׃ 30 וְלָמָּה-זֶּה מַשְׁלִיכִים אֲנַחְנוּ אֶת-נַפְשֵׁנוּ מִנֶּגֶד בְּכָל-רֶגַע וָרָגַע׃ 31 בַּעֲלִיצֻתִי אֲשֶׁר אֶעֶלְצָה בָכֶם אַחַי לִפְנֵי יֵשׁוּעַ הַמָּשִׁיחַ אֲדֹנֵינוּ הִנְנִי נִשְׁבַּעְתִּי כִּי-אָנֹכִי הוֹלֵךְ לָמוּת יוֹם יוֹם׃ 32 וְגַם-בְּאֶפְסוֹס הֲכִי כְדַרְכֵי אֱנוֹשׁ נִלְחַמְתִּי עִם-חַיְתוֹ יָעַר מַה-יִּתֵּן וּמַה-יּוֹסִיף לִי זֶה אִם-הַמֵּתִים לֹא יָקוּמוּ נֹאכַל וְנִשְׁתֶּה כִּי-מָחָר נָמוּת׃ 33 אַל-תִּשְׁעוּ בְּדִבְרֵי שָׁקֶר חֶבְרַת אֲנָשִׁים רָעִים תְּסַלֵּף אָרְחוֹת יְשָׁרִים׃ 34 הִתְעוֹרְרוּ בְצֶדֶק וְאַל-תֶּחֱטָאוּ כִּי-יֵשׁ אֲנָשִׁים אֲשֶׁר אֵין-בָּהֶם דַּעַת אֱלֹהִים לְבָשְׁתְּכֶם אֲנִי אֹמֵר כָּזֹאת׃ 35 וְכִי-יֹאמַר אִישׁ אֵיךְ יָקוּמוּ הַמֵּתִים מַה גְּוִיָּתָם בְּבוֹאָם׃ 36 סָכָל הֵן הַזֶּרַע אֲשֶׁר תִּזְרַע לֹא יִחְיֶה בִּלְתִּי אִם-יָמוּת רִאשֹׁנָה׃ 37 וְאֵת אֲשֶׁר תִּזְרַע לֹא תִזְרַע הָעֶצֶם הַהוּא אֲשֶׁר אַחֲרֵי-כֵן יִצְמָח כִּי אִם-גַּרְגַּר עָרֹם חִטָּה אוֹ זֶרַע אַחֵר׃ 38 רַק אֱלֹהִים יִתֶּן-לוֹ גְוִיָּה כְּפִי רְצוֹנוֹ לְכָל-זֶרַע וָזֶרַע גְּוִיָּה לְמִינֵהוּ׃ 39 וְלֹא כָל-בָּשָׂר וּבָשָׂר אֶחָד הוּא כִּי בְשַׂר אָדָם לְמִינוֹ וְכֵן בְּשַׂר בְּהֵמָה בְּשַׂר עוֹף וּבְשַׂר דָּגִים כָּל-אֶחָד לְמִינֵהוּ׃ 40 וְיֵשׁ גְּוִיּוֹת בַּשָּׁמַיִם וְיֵשׁ גְּוִיּוֹת בָּאָרֶץ אַךְ כְּבוֹד הַגְּוִיּוֹת אֲשֶׁר בַּשָּׁמַיִם שֹׁנֶה הוּא מִכְּבוֹד הַגְּוִיּוֹת אֲשֶׁר בַּאָרֶץ׃ 41 יֵשׁ כָּבוֹד אֶחָד לַשֶּׁמֶשׁ וְכָבוֹד אַחֵר לַיָּרֵחַ וְכָבוֹד אַחֵר לַכּוֹכָבִים כִּי-כוֹכָב מִכּוֹכָב שֹׁנֶה בִּכְבוֹדוֹ׃ 42 וּכְמוֹ-כֵן בִּתְקוּמַת הַמֵּתִים נִזְרַע בְּשַׁחַת-בְּלִי וְקָם לְחַיֵּי-עַד׃ 43 נִזְרַע בְּלֹא-כָבוֹד וְקָם בְּכָבוֹד נִזְרַע בְּלֹא-כֹחַ וְקָם בַּכֹּחַ׃ 44 נִזְרַע גֵּו נֶפֶשׁ חַיָּה וְקָם גֵּו אֲשֶׁר רוּחַ הוּא יֶשׁ-גֵּו נֶפֶשׁ חַיָּה וְיֶשׁ-גֵּו אֲשֶׁר רוּחַ הוּא׃ 45 וְכֵן כָּתוּב וַיְהִי הָאָדָם הוּא הָאָדָם הָרִאשׁוֹן לְנֶפֶשׁ חַיָּה וְהָאָדָם הָאַחֲרוֹן לְרוּחַ מְחַיֶּה׃ 46 וְלֹא זֶה הָרִאשׁוֹן אֲשֶׁר רוּחַ הוּא כִּי אִם-זֶה אֲשֶׁר נִשְׁמָתוֹ בְאַפָּיו וְאַחֲרָיו זֶה אֲשֶׁר רוּחַ הוּא׃ 47 הָאָדָם הָרִאשׁוֹן הוּא עָפָר מִן-הָאֲדָמָה וְהָאָדָם הַשֵּׁנִי הוּא הָאָדוֹן מִן-הַשָּׁמָיִם׃ 48 כְּמוֹ הָרִאשׁוֹן עָפָר כֵּן גַּם-בָּנָיו עָפָר הֵם וּכְמוֹ הַשֵּׁנִי מִן-הַשָּׁמַיִם כֵּן גַּם-אֵלֶּה אֲשֶׁר-לוֹ מִן-הַשָּׁמַיִם הֵם׃ 49 וְכַאֲשֶׁר לָבַשְׁנוּ דְמוּת הָאָדָם אֲשֶׁר יְסוֹדוֹ מֵעָפָר כֵּן נִלְבְּשָׁה דְמוּת הָאָדָם אֲשֶׁר מוֹצָאֹתָיו מִשָּׁמָיִם׃ 50 וְכָזֹאת אֲנִי אֹמֵר אַחַי כִּי-אֵין בְּכֹחַ בָּשָׂר וָדָם לָרֶשֶׁת מַלְכוּת הָאֱלֹהִים וּבֶן-כִּלָּיוֹן לֹא יִנְחַל אִי-כִלָּיוֹן׃ 51 רְאוּ הִנְנִי מְגַלֶּה סּוֹד לֹא כֻלָּנוּ נִישַׁן הַמָּוֶת אַךְ עֶצֶם נַפְשׁוֹתֵינוּ יְשֻׁנֶּה לְכֻלָּנוּ׃ 52 בְּרֶגַע כְּשִׁית עַיִן בִּמְשֹׁךְ הַיֹּבֵל תְּרוּעָה אַחֲרֹנָה כִּי יִתָּקַע בַּשּׁוֹפָר וְהַמֵּתִים יָקִיצוּ לְחַיֵּי עוֹלָם וְעֶצֶם נַפְשׁוֹתֵינוּ יְשֻׁנֶּה׃ 53 כִּי בֶן-כִּלָיוֹן זֶה יַעֲטֶה אִי-כִלָּיוֹן וּבֶן-מָוֶת זֶה יִלְבַּשׁ אַל-מָוֶת׃ 54 וְכַאֲשֶׁר בֶּן-כִּלָּיוֹן יַעֲטֶה אִי-כִלָּיוֹן וּבֶן-מָוֶת יִלְבַּשׁ אַל-מָוֶת אָז יָקוּם דְּבַר הַכָּתוּב בֻּלַּע הַמָּוֶת לָנֶצַח׃ 55 אַיֶּה נִצְחֲךָ מָוֶת אַיֵּה שֵׁבֶט אוֹנֵךָ שְׁאוֹל׃ 56 שֵׁבֶט הַמָּוֶת הוּא הַחֵטְא וְכֹחַ הַחֵטְא הִיא הַתּוֹרָה׃ 57 אַךְ בָּרוּךְ הוּא הָאֱלֹהִים אֲשֶׁר נָתַן-לָנוּ תְּשׁוּעָה נִצַּחַת בְּיַד יֵשׁוּעַ הַמָּשִׁיחַ אֲדֹנֵינוּ׃ 58 עַל-כֵּן הֱיוּ נְכֹנִים וּמְיֻסָּדִים אַחִים אֲהוּבִים וְלֹא תִתְמוֹטְטוּ וּבַעֲבוֹדַת אֲדֹנֵינוּ הוֹסִיפוּ לַעֲבֹד יוֹם יוֹם אַחֲרֵי אֲשֶׁר יְדַעְתֶּם כִּי-לֹא לָרִיק פְּעֻלַּתְכֶם בַּאֲדֹנֵינוּ׃

טז    1 וְעַל-אֹדוֹת קְבֻצַת הַנְּדָבוֹת לַקְּדשִׁים כַּאֲשֶׁר צִוִּיתִי אֶת-הַקְּהִלּוֹת בְּגָלַטְיָא כֵּן תַּעֲשׂוּ גַּם-אַתֶּם׃ 2 בְּאֶחָד בַּשַּׁבָּת כָּל-אִישׁ מִכֶּם כַּאֲשֶׁר תִּמְצָא יָדוֹ יָרִים אֶת-נִדְבָתוֹ לִהְיוֹת לְפִקָּדוֹן אִתּוֹ וְלֹא-תָרִימוּ אֶת-הַנְּדָבוֹת בְּבֹאִי׃ 3 וְהָיָה כַּאֲשֶׁר אָבוֹא אֶשְׁלַח אֶת-הָאֲנָשִׁים הַטּוֹבִים בְּעֵינֵיכֶם עִם-אִגְּרוֹת לְהָבִיא אֶת-נִדְבַתְכֶם לִירוּשָׁלָיִם׃ 4 וְאִם-יִכְשַׁר הַדָּבָר לָלֶכֶת גַּם-אָנֹכִי אָז יֵלְכוּ הֵם עִמָּדִי׃ 5 וַאֲנִי אָבֹא אֲלֵיכֶם מִן-מַקְדּוֹנְיָא כִּי דֶרֶךְ מַקְדּוֹנְיָא אֶאֱבֹרָה׃ 6 וְאוּלַי אָגוּר בְּתוֹכְכֶם אוֹ גַּם-אֶחֱרַף יְמֵי הַחֹרֶף עִמָּכֶם לְמַעַן תְּשַׁלְּחוּנִי אָז אֶל-אֲשֶׁר אֲנִי הוֹלֵךְ׃ 7 כִּי אֵין רְצוֹנִי כַיּוֹם לִרְאֹתְכֶם כְּאֹרֵחַ נָטָה לָלוּן כִּי אִם-אֲקַוֶּה לָשֶׁבֶת עִמָּכֶם יָמִים מִסְפָּר אִם-יִרְצֶה יְהוָֹה׃ 8 וּבְאֶפְסוֹס אֶתְמַהְמַהּ עַד-חַג הַשָּׁבֻעוֹת׃ 9 כִּי-שָׁם נִפְתַּח לִי שַׁעַר גָּדוֹל הַמְּלָאכָה גְדוֹלָה וְהַמִּתְקוֹמְמִים רַבִּים׃ 10 וְכִי יָבוֹא טִמוֹתִיוֹס תְּנֻהוּ-נָא לָשֶׁבֶת בְּתוֹכְכֶם בִּבְלִי-פָחַד כִּי-מְלֶאכֶת יְהוָֹה הוּא עֹשֶׂה כָּמֹהוּ כָּמֹנִי׃ 11 וְלָכֵן אַל-יִבְזֵהוּ אִישׁ אַךְ שַׁלְּחֻהוּ בְשָׁלוֹם וְאֵלַי יָבוֹא כִּי אֲחַכֶּה-לּוֹ עִם-הָאַחִים׃ 12 וְעַל-אֹדוֹת אַפּוֹלוֹס אָחִינוּ הִנֵּה הִפְצַרְתִּי בוֹ מְאֹד לָבוֹא אֲלֵיכֶם עִם-הָאַחִים וְאֵין לוֹ כָּל-רָצוֹן לָבוֹא עַתָּה בֹּא יָבוֹא לְעֵת-מְצֹא׃ 13 שִׁקְדוּ עִמְדוּ בְדֶרֶךְ אֱמוּנָה הִתְאשְׁשׁוּ וַעֲשׂוּ חָיִל׃ 14 וְכָל-מַעֲשֵׂיכֶם עֲשׂוּ מֵאַהֲבָה׃ 15 וַאֲנִי הִנְנִי דֹרֵשׁ מִכֶּם אֶחָי הֲלֹא יְדַעְתֶּם אֶת-בֵּית סְטְפָנוֹס כִּי-הֵם רֵאשִׁית פְּרִי אֲכַיָּא וְכִי הִקְדִּישׁוּ אֶת-נַפְשָׁם לְשָׁרֵת אֶת-הַקְּדוֹשִׁים׃ 16 אֲשֶׁר עַל-כֵּן לַאֲנָשִׁים כָּאֵלֶּה תָּסוּרוּ לְמִשְׁמַעְתָּם גַּם-אַתֶּם וּלְכָל-פֹּעֵל וְעֹבֵד כְּמוֹהֶם׃ 17 וַאֲנִי שָׂמַחְתִּי עַל בּוֹא סְטְפָנוֹס וּפָרְטוּנָטוֹס וַאֲכַיְקוֹס כִּי הֵמָּה מִלְאוּ אֶת-מַחְסֹרִי תַּחְתֵּיכֶם׃ 18 וְכִי-הִנִּיחוּ אֶת-רוּחִי וְרוּחֲכֶם יַחְדָּו עַל-כֵּן דְּעוּ יְקַר עֵרֶךְ אֲנָשִׁים כָּאֵלֶּה׃ 19 קְהִלּוֹת אַסְיָא שֹׁאֲלוֹת לָכֶם לְשָׁלוֹם עֲקִילַס וּפְרִיסְקָא וְגַם-הָעֵדָה אֲשֶׁר בְּבֵיתָם יֹאמְרוּ לָכֶם רֹב שָׁלוֹם בַּאֲדֹנֵינוּ׃ 20 הָאַחִים כֻּלָּם שֹׁאֲלִים לָכֶם לְשָׁלוֹם שַׁאֲלוּ אִישׁ לְרֵעֵהוּ לְשָׁלוֹם בִּנְשִׁיקַת הַקֹּדֶשׁ׃ 21 אֲנִי פּוֹלוֹס שֹׁאֵל לָכֶם לְשָׁלוֹם בִּכְתָב יָדִי׃ 22 מִי אֲשֶׁר אֵינֶנּוּ אֹהֵב אֶת-הָאָדוֹן יֵשׁוּעַ הַמָּשִׁיחַ יָחֳרָם מָרַן אֲתָא׃ 23 חֶסֶד יֵשׁוּעַ הַמָּשִׁיחַ אֲדֹנֵינוּ עֲלֵיכֶם׃ 24 וְאַהֲבָתִי עִם-כֻּלְּכֶם בְּיֵשׁוּעַ הַמָּשִׁיחַ אָמֵן׃

Index              Poster